იუსტიციის უმაღლესი საბჭოს მდივანი ლევან მურუსიძე მიიჩნევს, რომ მამუკა ახვლედიანის თანამდებობიდან გადაყენებაში ,, რაიმე რეპრესიული მომენტი არ არის”. მისი თქმით, საბჭომ იმსჯელა, რამდენად სწორად ხდებოდა საქალაქო სასამართლოში მენეჯმენტი.
იუსტიციის უმაღლესი საბჭოს მდივანი მიიჩნევს, რომ თეორიულად შესაძლებელია მამუკა ახვლედიანს მოსამართლის უფლებამოსილებაც შეუჩერდეს. მისი თქმით, ახვლედიანის შესაძლო დისციპლინური გადაცდომის შესახებ გადაწყვეტილება ჯერ მიღებული არ არის.
"მინდა სწორად გავიგოთ საკითხი, რომ ბატონი მამუკა გათავისუფლებულ იქნა მენეჯერული თანამდებობიდან – ის აღარ არის თავმჯდომარე. ის არის მოსამართლე და მას დღესაც, ხვალაც, მომდევნო დღეებშიც შეუძლია გამოხატოს თავისი პოზიცია სასამართლოში მიმდინარე პროცესებთან დაკავშირებით, ამიტომ მე ვერ ვხედავ, რომ რაიმე რეპრესიული ხდება. საბჭომ იმსჯელა ერთადერთ რამეზე, რამდენად სწორად ხდებოდა მენეჯმენტი სასამართლოში, რაც შეეხება მოსამართლის საქმიანობას, ამასთან დაკავშირებით საბჭოს არანაირად არ უმსჯელია", - განაცხადა მურუსიძემ.
იუსტიციის უმაღლესმა საბჭომ თბილისის საქალაქო სასამართლოს თავმჯდომარე მამუკა ახვლედიანი თანამდებობიდან დღეს გაათავისუფლა. ამ გადაწყვეტილებას საბჭოს პრეზიდენტის კვოტით არჩეული ვახტანგ მჭედლიშვილის გარდა ყველამ დაუჭირა მხარი. თბილისის საქალაქო სასამართლოს თავმჯდომარის მოვალეობის შემსრულებლად გიორგი ებანოიძე დაინიშნა.
