თბილისის საქალაქო სასამართლოს თავმჯდომარის თანამდებობიდან მამუკა ახვლედიანის გათავისუფლებასთან დაკავშირებით, ,,საქართველოს მოსამართლეთა ერთობის“ აღმასრულებელი დირექტორი ნაზი ჯანეზაშვილი აცხადებს, რომ იუსტიციის საბჭო უფროდაუფრო მეტ შეცდომებს უშვებს.
,,ვფიქრობ, რომ იუსტიციის უმაღლესი საბჭო უფროდაუფრო მეტ შეცდომებს უშვებს. მისი დამოკიდებულება ზოგადად მოსამართლეების მიმართ არის ძალიან არაერთგვაროვანი. გაუგებრია, თუ რატომ მიიღო მან ეს გადაწყვეტილება, რომ ამ საკითხის ინიცირება მოახდინა დღეს. მას სჭირდება უფრო მეტი დასაბუთება და კიდევ ერთხელ მოწმობს ეს ფაქტი, რომ იუსტიციის უმაღლეს საბჭოს აქვს ფართო დისკრეცია და ფართო უფლებამოსილება“, - განაცხადა ნაზი ჯანეზაშვილმა.
იუსტიციის უმაღლესმა საბჭომ თბილისის საქალაქო სასამართლოს თავმჯდომარე მამუკა ახვლედიანი თანამდებობიდან დღეს გაათავისუფლა. ამ გადაწყვეტილებას საბჭოს პრეზიდენტის კვოტით არჩეული ვახტანგ მჭედლიშვილის გარდა ყველამ დაუჭირა მხარი. თბილისის საქალაქო სასამართლოს თავმჯდომარის მოვალეობის შემსრულებლად გიორგი ებანოიძე დაინიშნა.
