„რამდენიმე ფოტო დაზიანდა. სამეცნიერო ნაშრომები და იშვიათი ბიბლიოთეკა შეიძლება განადგურდეს. მუზეუმი სასწრაფო რესტავრაციას მოითხოვს, მაგრამ ჯერ არაფერი ჩანს. მარტო სახურავის შეკეთებას 10 000 ლარი მაინც სჭირდება. ფიზიოლოგიის ინსტიტუტს უნდოდა მუზეუმის შეერთება და შესაბამისად უპატრონებდა კიდეც, მაგრამ გურჯაანის მუნიციპალიტეტის გამგებელმა გიორგი ჩივიაშვილმა უარი თქვა. დაგვპირდა, მუზეუმსაც მივხედავ და თანამშრომლების ხელფასსაც გავზრდიო, მაგრამ უშედეგოდ", - განუცხადა კახეთის საინფორმაციო ცენტრს მუზეუმის დირექტორმა დესი ფურცელაძემ.

გურჯაანის სამუზეუმო გაერთიანების დირექტორის შოთა უტიაშვილის განცხადებით, გამგეობასთან ერთად მუზეუმის რეაბილიტაციის სურვილი ივანე ბერიტაშვილის სახელობის ფიზიოლოგიის ინსტიტუტის დირექტორმა ნარგიზა ნაჭყებიამ გამოთქვა. „ეხლა არჩევნებია და რომ ჩავატარებთ, ამაზე მერე ვიზრუნებთ", - აღნიშნა შოთა უტიაშვილმა.

ივანე ბერიტაშვილს 2010 წლის იანვარში დაბადებიდან 125 წელი შეუსრულდა. ივანე ბერიტაშვილი დაიბადა სოფელ ვეჯინში, მღვდლის ოჯახში. 1918 წელს მან ფიზიოლოგიის ინსტიტუტი ჩამოაყალიბა.