უკრაინის პრეზიდენტმა პეტრო პოროშენკომ პრემიერ-მინისტრ არსენი იაცენიუკსა და გენერალურ პროკურორს ვიქტორ შოკინს გადადგომისკენ მოუწოდა. ადგილობრივი მედიის ინფორმაციით, განცხადება ამის შესახებ პრეზიდენტის ოფიციალურ ვებგვერდზე გამოქვეყნდა.
გამოცემა წერს, რომ პოროშენკოს მოსაზრებით, უკრაინის მთავრობამ ბევრი შეცდომა ჩაიდინა.
"ჩვენ დავიწყეთ უმნიშვნელოვანესი და ურთულესი რეფორმები. ხალხი მეტს ითხოვს. ნათელია, რომ საზოგადოებაც და ხელისუფლებაც ცვლილებების ტემპით უკმაყოფილოა", - ნათქვამია განცხადებაში. უკრაინის პრეზიდენტი უმაღლესი რადის დათხოვნასაც არ გამორიცხავს და ამბობს, რომ ამ უფლებას მხოლოდ კიდურეს შემთხვევაში გამოიყენებს.
დღეს უკრაინის რადას ფრაქციამ "პეტრო პოროშენკოს ბლოკი“, პრემიერ- მინისტრ არსენი იაცენუკის თანამდებობიდან გადაყენებისათვის 79 ხელმოწერა უკვე შეაგროვა. ხელისუფლების მიმართ უნდობლობის გამოსაცხადებლად, დეპუტატების მინიმუმ 150 ხელმოწერაა საჭირო.
პარალელურად უკრაინის უმაღლესი რადას შენობასთან საპროტესტო აქცია მიმდინარეობს. ადგილობრივი მედიის ინფორმაციით, მიტინგში 100-მდე ადამიანი მონაწილეობს, რომლებიც მინისტრთა კაბინეტის გადადგომას მოითხოვენ.
უმაღლეს რადაში დღეს უკრაინის პრემიერ-მინისტრი არსენი იაცენიუკი გამოდის, რომელიც 2015 წლის ანგარიშს წარადგენს და მთავრობის მუშაობას შეაფასებს.
გუშინ თანამდებობა ქვეყნის გენერალური პროკურორის მოადგილემ დატოვა. ვიტალი კასკომ საკუთარი გადაწყვეტილება მედიასთან განმარტა და განაცხადა, რომ კორუმპირებული მთავრობის პირობებში მუშაობა აღარ სურს. ამ განცხადებას ტვიტერით გამოეხმაურა უკრაინაში აშშ-ის ელჩი ჯეფრი პაეტი, რომელმაც კასკოს რეფორმებისთვის მებრძოლი უწოდა და დასძინა, რომ მისი გადადგომა „ძირს უთხრის რეფორმების მსვლელობას უკრაინაში“.
მანამდე თანამდებობიდან გადადგომის შესახებ განაცხადა უკრაინის ეკონომიკის მინისტრმა აივარას აბრომავიჩიუსმა, რომელმაც რეფორმების შეფერხების მიზეზად „მზარდი სისტემური წინააღმდეგობა“ დაასახელა.
