რუსეთის პრემიერ-მინისტრი დიმიტრი მედვედევი ნატო-რუსეთის ურთიერთობას ახალ ცივ ომს უწოდევს. ,,ბიბისის“ ინფორმაციით, ამის შესახებ მან მიუნხენის უსაფრთხოების კონფერენციაზე სიტყვით გამოსვლისას განაცხადა.
"ნატო-ს პოლიტიკური ხაზი რუსეთთან მიმართებაში კვლავ არამეგობრული და დახურულია. უფრო ხისტადაც ვიტყვი, ჩვენ ახალი „ცივი ომის“ დროში ვართ. თითქმის ყოველდღე აცხადებენ, რომ ჩვენ ვართ ყველაზე საშიში საფრთხე ხან ნატო-სთვის, ხან ცალკე ევროპისთვის. იღებენ საშინელ ფილმებს, სადაც რუსები ბირთვულ ომს იწყებენ. ზოგჯერ ვფიქრობ: ახლა 2016 წელია თუ 1962? ერთიანი დიდი ევროპა როგორც არ არსებობდა, ისე არ არსებობს", - განაცხადა მედვედევმა.
მისი შეფასებით, ახლო აღმოსავლეთისა და ჩრდილო აფრიკის ქვეყნებში კონფლიქტები გამწვავდა, შეიქმნა მიგრაციული კოლაფსი, ევროკავშირსა და რუსეთს შორის ურთიერთობა გაუარესდა, ხოლო უკრაინაში „სამოქალაქო ომია“.
„ნუთუ საჭიროა კიდევ ერთი მსოფლიო ომი იმისთვის, რომ გავიგოთ რამდენად საჭიროა თანამშრომლობა და არა კონფრონტაცია?“, - განაცხადა მედვედევმა.
მისივე მოსაზრებით, მიგრაციულმა კრიზისმა შენგენის ზონის არსებობას საფრთხე შეუქმნა.
ამასთან, სიტყვით გამოსვლისას, რუსეთის პრემიერი სირიის საკითხსაც შეეხო და აღნიშნა, რომ სირია როგორც ერთიანი სახელმწიფო არ უნდა დაიშალოს.
