ნატო ეგეოსის ზღვაში იმ კონტრაბანდისტების წინააღმდეგ იწყებს ოპერაციას, რომლებსაც მიგრანტები ევროპაში გადაჰყავთ. ,,ბიბისის“ ინფორმაციით ამის შესახებ ნატო-ს გენერალურმა მდივანმა იენს სტოლტენბერგმა ბრიუსელში გამართულ პრესკონფერენციაზე განაცხადა. მისი თქმით, შესაბამისი გადაწყვეტილება დღეს ალიანსის წევრი სახელმწიფოების თავდაცვის მინისტრებმა, მინისტერიალზე მიიღეს.
მიღებული გადაწყვეტილებით, რომელიც გერმანიის, თურქეთისა და საბერძნეთის ინიციატივა იყო, ნატო-ს ხომალდები, ევროპული სასაზღვრო სამსახურის, "ფრონტექსის" ძალებთან ერთად, ეგეოსისი ზღვაში პატრულირებას დაიწყებენ.
ეგეოსის ზღვაში ალიანსი გაგზავნის მეორე სამხედრო-საზღვაო ჯგუფს, რომელსაც გერმანია უხელმძღვანელებს.გარდა ამისა, ნატო თურქეთ-სირიის საზღვარზე გააძლიერებს დაზვერვას და მონიტორინგს.
ნატო-ს მინისტერიალზე ასევე გადაწყდა, რომ "ისლამური სახელმწიფოს" წინააღმდეგ ბრძოლაში, ალიანსი საერთაშორისო კოალიციას მეტ მხარდაჭერას გაუწევს და ამ მიზნით, აშშ-ის მოთხოვნით, ნატო გამოყოფს "AWACS"-ის სისტემით აღჭურვილ თვითმფრინავებს.
