მიხეილ სააკაშვილი უშიშროების სამსახურის მიერ გამოყოფილ დაცვაზე უარს ამბობს. ამის შესახებ ოდესის გუბერნატორმა სოციალურ ქსელ ფეისბუკზე დაწერა. “ბოლო დღეებში განვითარებული მოვლენების ფონზე და ასევე, იმ ინფორმაციის საფუძველზე, რაც მაქვს, უკრაინის უშიშროების სამსახურს ოფიციალური წერილი გავუგზავნე. მე მათ ვაცნობე, რომ დაცვა არ მჭირდება, რადგანაც არაფრის და არავისი არ მეშინია. დღეიდან ოდესასა და უკრაინის მთელ ტერიტორიაზე დაცვის გარეშე ვივლი,”-წერს საქართველოს ექსპრეზიდენტი. ბოლო დროს განვითარებულ მოვლენებში სააკაშვილი მის წინააღმდეგ წაყენებულ ბრალდებას გულისხმობს. მას შემდეგ, რაც მარიუპოლში უკრაინულ პოზიციებზე იმყოფებოდა, ოდესის გუბერნატორმა ფეისბუკზე ვიზიტის ამსახველი ვიდეომასალა ატვირთა, რის გამოც ის საიდუმლო მასალის ინფორმაციის შემცველი მასალის გავრცელებაში დაადანაშაულეს.
