პუტინმა მერკელს დაურეკა პოროშენკოსთან შეხვედრის შემდეგ. ამის შესახებ ,,ბიბისი“ იტყობინება. გერმანიის კანცლერმა ანგელა მერკელმა რუსეთს მოუწოდა, გავლენა მოახდინოს უკრაინის დონბასში მოქმედ სეპარატისტებზე, რათა მიღწეულ იქნას პროგრესი კონფლიქტის დარეგულირებაში.
გერმანიის მთავრობის ოფიციალური წარმომადგენლის შტეფენ ზაიბერტის ინფორმაციით, აღნიშნულის შესახებ მერკელმა რუსეთის პრეზიდენტ ვლადიმერ პუტინთან სატელეფონო საუბარში განაცხადა, რომელიც დღეს, რუსული მხარის ინიციატივით შედგა.
მერკელის თქმით, უკრაინაში კონფლიქტის დარეგულირების კუთხით პროგრესის მისაღწევად აუცილებელია ცეცხლის შეწყვეტის რეჟიმის დაცვა.
,,აქ რუსეთმა უნდა გამოიყენოს თავისი ზეგავლენა სეპარატისტებზე“ - აღნიშნა მან.
გუშინ გერმანიის კანცლერმა ბერლინში უკრაინის პრეზიდენტ პეტრო პოროშენკოს უმასპინძლა. როგორც შეხვედრის შემდეგ მერკელმა განაცხადა, ევროკავშირმა რუსეთის წინააღმდეგ სანქციები უნდა გაახანგრძლივოს.
