,,ნაციონალური მოძრაობის“ წევრის ზურაბ მელიქიშვილის შეფასებით, ხელისუფლებას ეშინია მოისმინოს ლარის გაუფასურების რეალური მიზეზები. მისივე თქმით, უნდა მოხდეს რეალური ანალიზი იმისა, თუ რა უნდა გაკეთდეს მდგომარეობის გამოსასწორებლად.
“მათ ნამდვილად ეშინიათ მოისმინონ ის რეალური მიზეზები, რამაც ძალზედ მძიმე მდგომარეობაში ჩაგადო ლარი და ეს არის შემცირებული ექსპორტი, ინვესტიციები, უაზრო რეგულაციები, რომელიც მათ მიიღეს. ძალზედ მნიშვნელოვანია, რომ უშუალოდ ეროვნული ბანკის პრეზიდენტისგან იქნას გაჟღერებული ყველა ის მიზეზი, რამაც ლარი ამ მდგომარეობაში ჩააგდო და ბუნებრივია ყველასთვის არის საინტერესო ანალიზი, თუ რა უნდა გაკეთდეს“ - განაცხადა ზურაბ მელიქიშვილმა.
შეგახსენებთ, ამ ეტაპისთვის გაურკვევლია, მოისმენს თუ არა პარლამენტი სებ-ის ანგარიშს. თუმცა პარლამენტის თავმჯდომარემ დღეს განაცხადა, რომ მნიშვნელობა არ აქვს როდის ეწურება ვადა გიორგი ქადაგიძეს, ეროვნული ბანკის ანგარიშს პარლამენტი მაინც მოისმენს.
„მოვუსმენთ მაშინ, როდესაც შევჯერდებით პარლამენტიც და ეროვნული ბანკიც. ჩვენ უნდა მოვისმინოთ ეროვნული ბანკის ანგარიში. შარშან რომ გასვლოდა ვადა გიორგი ქადაგიძეს - რა აღარ უნდა მოგვესმინა ანგარიში? ჩვენ ბანკის ანგარიში გვაქვს მოსასმენი. ეს უკავშირდება არა ქადაგიძეს ან კონკრეტულ გვარს, არამედ იმას, როდის მოხდება ამ საკითხის განხილვა პარლამენტში,“ - აღნიშნა დავით უსუფაშვილმა.
