ე.წ. კანონიერ ქურდის მინდია გორაძის, მეტსახელად ლავას ოღლის ადვოკატის შეფასებით, ფაქტიურად, ქართველმა სამართალდაცავებმა იგი მოლდოვადან მოიპარეს. ლექსო კობაიძის განცხადებით, ამ ეტაპზე, დაკავებული დუმილის უფლებას ინარჩუნებს. ,,ჩვენთვის გაურკვეველია ბრალდების არსი. მიგვაჩნია, რომ ბრალდება არ არის საფუძვლიანი, აქედან გამომდინარე ჩვენ ვაპირებთ, რომ ბოლომდე დავამტკიცოთ ჩვენი სიმართლე. ფაქტიურად, მოლდოვის სახელმწიფოდან ჩვენმა სამართალდამცავებმა იგი მოიპარეს - სრული ამ სიტყვის მნიშვნელობით, ვინაიდან ამ ადამიანს მოლდოვის სახელმწიფოში ჰქონდა პროცესები სხვა საკითხთან დაკავშირებით და ერთ დღეს დილის 05:00 საათზე, მას თავს დაესხნენ და აღმოჩნდა საქართველოში“ - განაცახადა კობაიძემ.

შეგახსენებთ, რომ მინდია გორაძის დეპორტაცია მოლდოვადან საქართველოში გუშინ მოხდა. მას დღეს ბრალი ოფიციალურად უნდა წაუყენონ. დაკავებული ამჟამად ქუთაისშია გადაყვანილი. ბრალის წარდგენის შემდეგ, სასამართლო მისთვის აღკვეთის ღონისძიების საკითხს გადაწყვეტს.