„პანკისის ხეობაში არაფერი ხდება ისეთი, რის გამოც უშიშროების საბჭოზე საუბარი იქნებოდა საჭირო. ხეობაში ადამიანები ცხოვრობენ ზუსტად იმ ცხოვრებით, როგორც დანარჩენ საქართველოში“,- განაცხადა საქართველოს თავდაცვის მინისტრმა ტელეკომპანია „მაესტროს“ გადაცემა „მაესტროს ფაქტორში“ სტუმრობისას. გადაცემის წამყვანმა თინათინ ხიდაშელს შეკითხვა უშიშროების საბჭოზე განხილული თემების კონტექსტში დაუსვა და დაინტერესდა, იმსჯელა თუ არა საბჭომ რუსეთის ფედერაციის საგარეო საქმეთა მინისტრის სერგეი ლავროვის იმ განცხადების შესახებ, რომლის თანახმადაც, პანკისი ტერორისტების თავშესაფარს წარმოადგენს.
„ჩვენ ცოტა ხნის წინ ვიყავით პანკისის ხეობაში, წავიყვანეთ მედია, რამდენიმე სოფელი ფეხით შემოვიარეთ. ამ ვიზიტის მიზანი და ამოცანა ყველაფერთან ერთად ისიც იყო, რომ დაგვემშვიდებინა ჩვენი საზოგადოება და ყველას ჰქონოდა შესაძლებლობა ენახა, რომ იქ აბსოლუტურად მშვიდი ვითარებაა. პანკისის ხეობაში ჩვენი თანამოქალაქეები ზუსტად ისეთივე ცხოვრებით ცხოვრობენ, როგორც ყვარელში, გურჯაანში ან - საქართველოს ნებისმიერ სხვა ტერიტორიაზე, იგივე პრობლემები აქვთ, იგივე სიხარული აქვთ, იგივე პროექტებში მონაწილეობენ, იგივე გასაჭირი აქვთ, რაც ყველა სხვა დანარჩენს. სრული პასუხისმგებლობით ვამბობ, არავითარი საუბარი ამ განცხადებებთან დაკავშირებით არ ყოფილა. ჩვენ პანკისის ხეობიდან არანაირ საფრთხეს არ ველოდებით“,- განაცხადა თავდაცვის მინისტრმა.
