,,ნაციონალური მოძრაობის“ ერთ-ერთი ლიდერის სერგო რატიანის შეფასებით, ,,ქართულმა ოცნებამ“ გარდაბანში ადგილობრივი არჩევნები ხალხის დაშინებით მოიგო. მისივე თქმით, ოქტომბერში 73 ოლქში ამას ვერ შეძლებენ და ,,სერიოზულად დამარცხდებიან“.
,,როგორც ჩვენ ყველამ ვნახეთ, ხელისუფლებამ გამოიყენა ყველა მეთოდი - ადმინისტრაციული რესურსი, სუს-ი, დაშინება, ზონდერები, ჩხუბები უბნებზე, ამ ყველაფრით მათ წარმატება მოიპოვეს ერთ ოლქში, თუმცა, ოქტომბერში იქნება 73 ოლქი. ჩვენთვის მნიშნელოვანი იყო, მოქმედებაში გვენახა ხელისუფლება, ჩვენ ვნახეთ და ვნახეთ, რომ მას აქვს მხოლოდ ნეგატიური კამპანია, ფაქტობრივად დაპირებებსაც აღარ აძლევენ ადამიანებს, რადგან ამისი აღარავის სჯერა. ზემოქმედებით, ადმინისტრაციული რესურსით, დაშინებებით, ჩხუბით მათ მიაღწიეს ერთ ოლქში წარმატებას, მაგრამ 73 ოლქში ისინი წარმატებას უბრალოდ ვერ მიაღწევენ და ოქტომბერში მათ ელით სერიოზული დამარცხება. ამ ეტაპზე მე ვისურვებდი, რომ დარჩენილ დროს მათ რამე მაინც გაეკეთებინოთ ადამიანებისათვის", - განაცხადა რატიანმა.
ცესკოს ინფორმაციით, გარდაბანში გამართულ ადგილობრივი თვითმმართველობის არჩევნებში "ქართული ოცნების" გამგებლობის კანდიდატმა, გოჩა ჯამარაულმა ხმების 70,15%-ი მიიღო,
ცესკო-მ გარდაბნის საარჩევნო ოლქის 64 უბანი უკვე დათვალა, მათ შორის ერთი სპეცუბანი.
ცესკო-ს ინფორმაციით, "ქართული ოცნების" კანდიდატმა გოჩა ჯამარაულმა არჩევნებში მონაწილეთა ხმების 70,15%-ი მიიღო, ხოლო "ნაციონალური მოძრაობის" კანდიდატმა ბესიკ კახაბრიშვილმა – 29.85 %-ის. შესაბამისად, ჯამარაულმა 16 104 ხმა მიიღო, ხოლო კახაბრიშვილმა - 6851.
გარდაბნის მუნიციპალიტეტში ამომრჩეველთა აქტივობამ 33,13 % შეადგინა.
