რუსეთს საერთაშორისო რეზერვები მინიმუმ ორ წელიწადს მაინც ეყოფა. ამის შესახებ ცნობილმა ამერიკელმა ფინანსისტმა ჯორჯ სოროსმა განაცხადა. მისივე თქმით, არასახარბიელო ეკონომიკური კონიუნქტურის პირობებში რუსეთს ჯერ საკმარისი რესურსი რჩება. ანალოგიური განცხადება გააკეთა რუსეთის ბანკმაც, რომლის თანახმადაც, ქვეყნის საერთაშორისო რეზერვები დღეისათვის 368 მილიარდ დოლარს აღემატება. რუსეთის ეკონომიკა კატასტროფულ მდგომარეობაში მას შემდეგ აღმოჩნდა, რაც მსოფლიო ბაზარზე ნავთობის ფასი დაეცა. დღეისათვის ერთი ამერიკული დოლარის ღირებულება 83, 59 რუბლს შეადგენს, ევროს კურსმა კი 91 რუბლს გადააჭარბა.
