ბავარიული ოლქის, ლანდსხუტის ადმინისტრაციის ხელმძღვანელმა ხელისუფლების საემიგრაციო პოლიტიკა რადიკალური ფორმით გააპროტესტა. სირიელი ლტოლვილების ავტობუსი პეტერ დრაიერმა ბერლინში პირდაპირ ანგელა მერკელის ოფისს მიაყენა. როგორც აქციის ორგანიზატორმა განაცხადა, ავტობუსში ლტოლვილები საკუთარი ნებით ჩასხდნენ და ბერლინში გამგზავრებაზე თანხმობა თქვეს, თუმცა როგორც მოგვიანებით გაირკვა, ავტობუსში მყოფთა უმრავლესობამ აქციის პოლიტიკური შინაარსის შესახებ არაფერი იცოდა, რის გამოც მათ პროტესტი გამოთქვეს. ბერლინში ჩაყვანილი ლტოლვილების სასტუმროს ხარჯები გუბერნატორმა თავად გაიღო. დრაიერის თქმით, აქციით მას იმის თქმა სურდა, რომ ადგილობრივი ადმინისტრაციები ლტოლვილთა მოზღვავებული ნაკადის მოთხოვნებს ვერ აკმაყოფილებენ.
