პრეზიდენტის ადმინისტრაციის უფროსი, გიორგი აბაშიშვილი იმედოვნებს, რომ უახლოეს მომავალში საქართველოს სახელმწიფო დროშის საზეიმო აღმართვა დღესდღეობით ოკუპირებულ რეგიონებშიც მოხდება.
პრეზიდენტის სასახლეში სახელმწიფო დროშის დღესთან დაკავშირებულ ღონისძიებაზე ჟურნალისტებთან საუბრისას მან ასევე განაცხადა, რომ დღეს სპეციალურად სახელმწიფო დროშის დღესთან დაკავშირებით საქართველოს კანონმდებლობის შესაბამისად დამზადდა სახელმწიფო დროშის ორიგინალი, რომელიც საპატიო ყარაულის თანხლებით, სიმბოლურად საზეიმოდ აღიმართა საქართველოს პრეზიდენტის სასახლეზე.
,,დღეს მოხდა საქართველოს სახელმწიფო დროშის აღმართვა საქართველოს 9 რეგიონში. სამწუხაროდ, ჯერ კიდევ ვერ მოხერხდა დროშის აღმართვა ოკუპირებულ რეგიონებში, თუმცა მოხერხდა საოკუპაციო ზოლთან, ენგურის ხიდთან, პოლიციის ბოლო ბლოკ-პოსტზე და შინდისში, სწორედ იმ ბრძოლის ადგილზე, სადაც შინდისის გმირები დაიღუპნენ. რა თქმა უნდა, იმედი გვაქვს, რომ უახლოეს მომავალში სახელმწიფო დროშის საზეიმო აღმართვა ჩვენ მოგვიწევს დღესდღეობით საქართველოს ოკუპირებულ რეგიონებში", - აღნიშნა აბაშიშვილმა.
