„გაზპრომთან“ მიმდინარე მოლაპარაკებებთან დაკავშირებით, საკომიტეტო მოსმენა გაიმართება, - ამის შესახებ დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ ზურაბ ტყემალაძემ განაცხადა.
მისი თქმით, ოპოზიცია მოსახლეობას ისეთ ინფორმაციას აწვდის, თითქოს, ვიღაცას საქართველოში „გაზპრომი“ შემოყავს.
,,„გაზპრომი“ საქართველოში უკვე 20 წელზე მეტია, მუშაობს და „ნაციონალური მოძრაობის“ ხელისუფლებაში ყოფნის დროს კომპანიას ქვეყანაში უფრო მეტი გაზი შემოჰქონდა. ამ საკითხთან დაკავშირებით, ჩემთვის ყველაფერი გასაგებია, კითხვები არ მაქვს. ოპოზიციას სრული უფლება აქვს, თავად მოიწვიოს ენერგეტიკის მინისტრი. შემოსულია არასამთავრობო ორგანიზაციების განცხადებაც და კომიტეტი იმსჯელებს მინისტრის მოწვევის მიზანშეწონილობის საკითხზე“, -აღნიშნა დეპუტატმა.
საკანონმდებლო ორგანოში ენერგეტიკის მინისტრის დაბარებას ,,ნაციონალური მოძრაობა“ ითხოვს. ოპოზიციას შეკითხვები აქვს ,,გაზპრომთან“ თანამშრომლობის საკითხზე.
