დედაქალაქის მერის განცხადებით, გიორგი სოლომონიას მიერ თანამდებობის დატოვება არ უკავშირდება ინფრასტრუქტურული პროექტების განხორციელების ტემპებს.
სოლომონიას შემცვლელის წარდგენის შემდეგ, დავით ნარმანიამ აღნიშნულ საკითხზე ჟურნალისტების კითხვებს უპასუხა, რომელიც თბილისის მთავრობის მიმართ ახალი პრემიერის განწყობას შეეხებოდა. მერის განცხადებით, ეს საკითხი ოპოზიციის მიერ არის წამოწეული.
"პრემიერის განწყობა და პოზიცია დედაქალაქთან მიმართებაში არის ის, რომ ჩვენ ერთობლივად გავაგრძელოთ დედაქალაქის განვითარება, რაშიც გვაქვს სრული მხარდაჭერა. მეორე მხრივ არის მზაობა ძალიან მჭიდრო თანამშრომლობის. მესამე მხრივ, ჩვენ ასევე მზად ვართ აქტიურად ვითანამშრომლოთ იმისთვის, რომ ერთობლივი ძალისხმევით, ერთობლივი ზრუნვით გავხადოთ ჩვენი ქალაქი საცხოვრებლად ბევრად უფრო მიმზიდველი და კომფორტული", - განაცხადა დავით ნარმანიამ.
მან დადებითად შეაფასა გიორგი სოლომონიას მუშაობა მერიაში და აღნიშნა, რომ სოლომონიას მიერ თანამდებობის დატოვება ინფრასტრუქტურული პროექტების განხორციელების ტემპთან კავშირში არ არის.
,,ოპოზიცია როგორც ყოველთვის ახლაც ცდილობს რაღაცები მოიფიქროს, მოიგონოს და ამით მოიგოს საინფორმაციო სივრცე", - აღნიშნა თბილისის მერმა.
დავით ნარმანიამ დედაქალაქის მერის მოადგილის თანამდებობაზე დღეს გიორგი ლილუაშვილი წარადგინა.
