საქმის ჩამფარცხველები შოთაძემ თავის პროკურატურაში მოიკითხოს, ამის შესახებ მთავარი პროკურორის განცხადებების პასუხად საკრებულოს წევრმა ალეკო ელისაშვილმა განაცხადა.
„სპეკულანტები და საქმის ჩამფარცხველები შოთაძემ თავის პროკურატურაში მოიკითხოს, კეზერაშვილის ყოფილმა მაღალჩინოსანმა შოთაძემ”, - განაცხადა ელისაშვილმა.
მისი თქმით, გამოძიება მიდის იქით, რომ ბესელია და კობახიძეს პასუხისმგებლობა აარიდონ.
“გამოძიება მიდის იქით, რომ ბესელია და კობახიძე როგორმე გამოაძვრინონ, როდესაც პარლამენტში საგამოძიებო კომისია შეიქმნება, სადაც ცხრაკლიტულში ჩაკეტილ გამომძიებელთან კი არ ვიჯდები საათობით, არამედ იქ საზოგადოებაც იქნება და მედიაც და იმ ადამიანს ავასახელებ და მის დაკითხვასაც მოვითხოვ“, - განაცხადა ელისაშვილმა.
მან ასევე განაცხადა, რომ დაკითხვის დროს, სავარაუდოდ ფარული კამერით იღებდნენ.
„ჩემი დაკითხვის დროს ფარული კამერით აშკარად ვიღაცები მიყურებდნენ, შეიძლება ბესელიაც იყო სადმე სავარძელში მოკალათებული და გამომძიებელს „ეჩათავებოდნენ“, აბა ახლა ეს კითხე, ახლა ეს, ასეთ გამოძიებას ამ ადამიანს მე ხელში არ ჩავუგდებ, “- განაცხადა ალეკო ელისაშვილმა.
შეგახსენებთ, ირაკლი შოთაძემ იმედი გამოვთქვა, რომ ალეკო ელისაშვილი ბოლოს და ბოლოს დაასახელებს იმ პიროვნებას, რომელმაც მისივე სიტყვებით, მას მიაწოდა კორუფციული დანაშაულის შესახებ ინფორმაცია.
„კონკრეტულად იმის შესახებ, რომ დეპუტატებს ჰქონდათ შეწყალების საქმეში ქრთამი აღებული”, - განაცხადა საქართველოს მთავარმა პროკურორმა ირაკლი შოთაძემ.
შოთაძემ აღნიშნა, რომ მისი სურვილი იქნებოდა ელისაშვილს რეალურად ეთანამშრომლა გამოძიებასთან
„მე ვისურვებდი, რომ მას რეალურად ეთანამშრომლა გამოძიებასთან და რეალურად დაესახელებინა ის პირი, რომელსაც მართლაც შეუძლია გამოძიებას მიაწოდოს ინფორმაცია შესაძლო დანაშაულის შესახებ", -განაცხადა შოთაძემ.
პროკურორის თქმით, ნებისმიერი პირის მიმართ, თუ მისი ბრალეულობა გამოიკვეთება, კანონით გათვალიწინებული ღონისძიებები გატარდება.
"ნებისმიერი პიროვნების მიმართ, თუ იკვეთება სისხლის სამართლის საქმეში მისი ბრალეულობა, არსებობს კანონმდებლობით გათვალისწინებული ღონისძიებები, რაც გულსიხმობს მის პასუხისგებაში მიცემას. ჩვენ ამას არასდროს არ მოვრიდებივართ და არც მომავალში მოვერიდებით", - განაცხადა შოთაძემ.
მთავარმა პროკურორმა ყურადღება გაამახვილა იმ გარემოებაზეც, რომ გამოძიების ფარგლებში დაკითხულნი არიან ყოფილი მთავარი პროკურორი და მოადგილე.
„ არც გიორგი ბადაშვილი და არც გიორგი გოგაძე არ უარყოფენ ასეთი შეხვედრის ფაქტს. შესაბამისად, რატომ ხდება ამ ჩანაწერებით სპეკულირება, ჩემთვის გაუგებარია. მათ დაადასტურეს, რომ იყო შეხვედრა, თუმცა ამ შეხვედარზე არ ყოფილა საუბარი შეწყალების კომისიის საქმიანობაზე და იმ პრობლემატიკაზე, რომელიც შეწყალების საქმიანობას თან ახლავს”, - განაცხადა შოთაძემ და დასძინა, - “სამწუხაროდ, პროკურატურას იმის რესურსი არ აქვს, რომ წელიწადნახევრის განმავლობაში შეინახოს ასეულობით კამერის ჩანაწერი, რაც საკმაოდ დიდ რესურსს საჭიროებს", - განაცხადა შოთაძემ.
