ექსპერტი თორნიკე შარაშენიძე აცხადებს, რომ ,,გაზპრომთან“ დაკავშირებით ენერგეტიკის მინისტრისგან მოსმენილ ინფორმაციაში საგანგაშო არაფერია და მისთვის გაუგებარია, რატომ იწვევს აგრესიას ამ საკითხთან დაკავშირებით დასმული კითხვები. ამის შესახებ ექსპერტმა ენერგეტიკის მინისტრ კახა კალაძესა და ექსპერტებს შორის დღეს გამართული შეხვედრის შემდეგ განაცხადა.
"ახლა რაც მოვისმინეთ, იმაში თითქოს საგანგაშო არაფერია. საუბარი დეფიციტის შევსებაზე, მაგრამ საინტერესო არის ის, რომ რამდენიმე თვეა ეს ამბავი მიმდინარეობს, გვესმის ურთიერთგამომრიცხავი განცხადებები და როცა მერე კითხვები გაგვიჩნდება პასუხად არის აგრესია. შეიძლებოდა მსგავსი შეხვედრების ორგანიზება ხშირად, პერიოდულად, რომ კითხვები არ დაბადებულიყო. თვითონაც თუ არაფერს აშავებდნენ, ეთქვათ ეს ყველაფერი მშვიდად და ჩვენც ვიქნებოდით წყნარად", - განაცხადა თორნიკე შარაშენიძემ.
რაც შეეხება კონკრეტულ ინფორმაციას, მისი თქმით, შეხვედრაზე საუბარი იყო ბუნებრივი აირის დეფიციტის შევსებაზე და იმ მიზეზებზე, რატომაც არის უფრო მიზანშეწონილი "გაზპრომთან" საუბარი.
ექსპერტის განცხადებით, ტრანზიტის საფასურის ფულადი სახით ანაზღაურების წინადადება, რუსეთის ინიციატივაა.
"რუსეთი ითხოვს, რომ ამ რეჟიმში მოხდეს სატრანზიტო გაზის მიწოდება, მაგრამ შემდეგ მოახდენს დამატებითი გაზის მოწოდებას“, - განაცხადა შარაშენიძემ.
მისივე ინფორმაციით, ხვალ საქართველოში ჩამოდის ,,სოკარის“ წარმომადგენელი და ისინი საკუთარ პოზიციას დააფიქსირებენ.
