ადამიანის უფლებათა საპარლამენტო კომიტეტის თავმჯდომარის ეკა ბესელიას შეფასებით, პრეზიდენტის მიერ საარჩევნო კოდექსში ცვლილებებზე ხელმოწერის შემდგე გაკეთებული კრიტიკული განცხადებები არ ქმნის სერიოზულ პოლიტიკურ ფონს.
მისი თქმით, უმჯობესია პრეზიდენტი გაეცნოს იმ არგუმენტებს, რომლითაც შესაბამისი პოლიტიკური შეთანხმებაა ახსნილი.
,,იმდენი არგუმენტი იყო ნათქვამი და იმდენზე იყო ეს პოლიტიკური შეთანხმება ახსნილი, რომ არა მგონია, რაიმე გაუგებარი იყოს. პრეზიდენტი, უმჯობესია, ამ არგუმენტებს გაეცნოს. საარჩევნო კამპანია უკვე დაწყებულია და მუდმივი ცვლილებების პროცესში ყოფნა არასტაბილურობას შექმნის. პოლიტიკური შეთანხმების ნაწილია ის ცვლილებები, რასაც მან ხელი მოაწერა და შესაბამისად, სურვილებით გაკეთებული განცხადებები არ ქმნის სერიოზულ პოლიტიკურ ფონს", - განაცხადა ეკა ბესელიამ.
საქართველოს პრეზიდენტმა "საარჩევნო კოდექსში" განხორციელებულ ცვლილებებს ხელი მოაწერა, თუმცა ამასთანავე დღეს გამართულ ბრიფინგზე მწვავედ გააკრიტიკა აღნიშნული ცვლილებები. მისი თქმით, "არანაირად არ არის ის საარჩევნო რეფორმა, რომელზეც წლებია ვსაუბრობთ".
გიორგი მარგველაშვილი ასევე მიიჩნევს, რომ საარჩევნო სისტემაში ცვლილებების ამოქმედების გადადება 2020 წლისთვის, სათანადოდ არგუმენტირებული არ არის და გაუგებარია.
