იუსტიციის უმაღლესი საბჭოს თავმჯდომარე ნინო გვენეტაძე აცხადებს, რომ იუსტიციის უმაღლეს საბჭოს სხდომაზე საქალაქო სასამართლოს თავმჯდომარის, მამუკა ახვლედიანის მიერ ბოლო დროს გაკეთებული განცხადებების განხილვა მოხდება. მისი თქმით, სხდომაზე ახვლედიანი დაბარებული იყო, რადგან მის ყველა კითხვას უნდა გაეცეს პასუხი. .
"მამუკა ახვლედიანი არის მოწვეული დღევანდელ სხდომაზე იმ განცხადებებთან და პრეტენზიებთან დაკავშირებით, რომელიც აქვს. საბჭო მზად არის მოისმინოს მისი პოზიცია და დასაბუთებული პასუხები გასცეს. მან უნდა განმარტოს, თუ რას ნიშნავდა მისი განცხადებები მოსამართლეთა შესარჩევი კონკურსის და სხვა საკითხების შესახებ", - განაცხადა გვენეტაძემ.
რაც შეეხება ახვლედიანის განცხადებას, რომ იუსტიციის უმაღლესი საბჭო უნდა დაიშალოს და გვენეტაძემ დატოვოს თანამდებობა, გვენეტაძის თქმით, საქალაქო სასამართლოს თავმჯდომარეს მოეთხოვება, ეთიკის ნორმების დაცვით გააკეთოს განცხადებები.
თბილისის საქალაქო სასამართლოს თავმჯდომარე მამუკა ახვლედიანი იუსტიციის უმაღლეს საბჭოს სხდომაზე მისვლას საჭიროდ არ მიიჩნევს. როგორც მან დღეს გამართულ ბრიფინგზე განაცხადა, იგი საბჭოს სხდომაზე დაბარებული იყო, სადაც მის მიერ გაკეთებულ განცხადებებს განიხილავენ.
"დღეს იუსტიციის უმაღლესი საბჭოს სხდომაა დანიშნული. არ ვიცი რა საკითხებს განიხილავენ. მეც შემატყობინეს და მითხრეს რომ სხდომაა, თუმცა არ ჩავთვალე საჭიროდ სხდომაზე მისვლა. შეფასებებს აპირებენ ჩემი განცხადებების. მე ვფიქრობ, რომ ჩემს განცხადებებზე მნიშვნელოვანი პრობლემატიკა არსებობს სასამართლო სისტემაში და სჯობს ამ საკითხებზე იმსჯელონ. ის, რომ ჩემს განცხადებებს განიხილავენ, ჩემთვის ცნობილი გახდა, როდესაც ტელეფონით შემატყობინეს", -განაცხადა მამუკა ახვლედიანმა.
