საპარლამენტო უმრავლესობის ლიდერი ზვიად კვაჭანტირაძე ოზურგეთის მუნიციპალიტეტის სოფლებში ახალ წელს, დენის გათიშვის გამო “ენერგო პრო ჯორჯიას” უპირისპირდება და ირაკლი მეძმარიაშვილის გაფრთხილებას იხსენებს , რომლითაც მან ჯერ კიდევ ოქტომბერში საქართველოს მთავრობას მიმართა. კვაჭანტირაძე აცხადებს, რომ “ენერგო პრო ჯორჯიას” გამოქომაგება არავინ გაბედოს და კომპანიას ჰპირდება, რომ პასუხს მოსთხოვს მთელი სიმკაცრით.
”ფოტოები საახალწლო ოზურგეთიდან გულს მიხალისებს და მიუხედავად ამდენი სილამაზისა, მიუხედავად ამხელა სამზადისისა ქალაქში თუ სოფლებში, ასობით აბონენტი ოზურგეთის მუნიციპალიტეტში (ძირითადად სოფლებში) უშუქოდ შეხვდა ახალ წელს. წარმოიდგინეთ? მესმის, დღეს ამის წარმოდგენა ძნელია, მაგრამ ფაქტია. მართალია, ამ გაფუჭებულ საქმეზე მაქსიმალურად მოიკრიბეს ძალები და 70 %-ის აღდგენა მოხერხდა 12 საათამდე, მაგრამ ამ წუთისთვის, ანუ , 2 იანვრის 01:05 ისთვის ისევ 3500 აბონენტია გამორთული. ფიზიკური მიზეზი??? – ნუ იტყვით და თოვლი მოსულააა.:)))
სასაცილოა, სატირალი რომ არ იყოს. დეკემბერში თოვლი აბა არ უნდა მოვიდეს???? ალბათ “ენერგო პრო ჯორჯია” ახალ წელს თოვლს საერთოდ არ ელოდებოდა. ჯერ კიდევ ოქტომბრის პირველ რიცხვებში ერთი ძალიან გამოცდილი კაცი ირაკლი მეძმარიაშვილი გვაფრთხილებდა ყველას, მოემზადეთ ზამთრის სეზონისთვისო. ყველას დავუგზავნე მაშინ ეს გაფრთხილება. ეტყობა, ენერგო პრო ჯორჯიაში არც უნახავთ. ან ჩემი გაფრთხილება რათ უნდათ, რა, თავად არ იციან, რომ დამპალი ბოძები და სადენები , რომელთა მოვლა- პატრონობის და ზამთრისთვის მომზადების პირდაპირი ვალდებულება გააჩნიათ პრობლემებს შექმნიან თუ დროზე არ მიხედე? ტარიფების მომატებაზე ხომ იზრუნეთ, ამ დროს გამრიცხველიანებასაც კი ვერ ახერხებთ.!!! ერთ თეთრს ერთი დღით არავის პატიობთ და გინდათ თქვენმა აბონენტებმა გაპატიოთ ასეთი უპასუხისმგებლობა! 2 ღამეა ოზურგეთში მთელი ხელმძღვანელობა ფეხზე დგას, საკუთარ ოჯახებშიც არ მისულან, ხან ერთი ხაზის რემონტზე არიან, ხან მეორესი და ასობით საყვედურის მოსმენა უწევთ. რატომ, თორემ კი???? არ გაფრთხილებდნენ, არ გთხოვდნენ დროზე მიგეღოთ ზომები და ზამთრისთვის სარემონტოები ბოლომდე მიგეყვანათ? ხვალ 15 ბრიგადას აგზავნიან ოზურგეთში. აქამდე რომ გეზრუნათ არც ამ ბრიგადებს გაუმწარებდით ახალი წლის დღესასწაულებს.
არც კი იფიქროს ვინმემ თქვენი გამოქომაგება “ენერგო პრო ჯორჯია” !!!
რაც თქვენ ეს ორი დღეა თქვენი უპასუხისმგებლობით ხალხს და ჩვენს ხელისუფლებას გვავნეთ, ამას ასე მარტივად არ გადაგატანინებთ. პასუხს მოგთხოვთ მთელი სიმკაცრით!
P.S. ამ სტატუსის ადრესატი მხოლოდ “ენერგო პრო ჯორჯიაა” და ჟურნალისტები და სააგენტოები კუდებს ნუ გამოაბამთ. ჩვენ, ხელისუფლებაში ყველას ერთნაირი საზრუნავი გვაქვს და ერთმანეთს ყოველთვის გვერდში დავუდგებით პრობლემების მოსაგვარებლად”, - წერს ზვიად კვაჭანტირაძე .
