2015 წელს ევროპის საზღვარი მილიონზე მეტმა ლტოლვილმა გადაკვეთა. საგანგაშო სტატისტიკას გაეროს ლტოლვილთა საკითხების სააგენტო აქვეყნებს. ამავე ინფორმაციით, მიგრანტთა 80 პროცენტი ევროპის ტერიტორიაზე საბერძნეთის გავლით მოხვდა. მათმა უმრავლესობამ საბერძნეთის კუნძულ ლესბოსამდე ზღვის გავლით მიაღწია. 150 ათასამდე ლტოლვილი კი ხმელთაშუა ზღვის გავლით ლიბიიდან იტალიაში გადავიდა. მეორე მსოფლიო ომის შემდეგ ეს ევროპაში ყველაზე მასშტაბური საემიგრაციო კრიზისია.
