ერაყის პრემიერ-მინისტრი რამადიში ჩავიდა. ქალაქში, რომელიც სახელისუფლო ძალებმა ისლამისტებისგან გაწმინდეს, ჰაიდერ აბადიმ რამდენიმე საათი დაჰყო. მთავრობის მეთაური ადმინისტრაციულ კომპლექსში იმყოფებოდა, სადაც ერაყის დროშა აღმართა და უახლოეს ხანებში მეორე სტრატეგიული ქალაქის, მოსულის გათავისუფლების პირობა დადო. რამადი ისლამური სახელმწიფოს მებრძოლებმა მაისში აიღეს. მას შემდეგ სახელისუფლო ძალებმა ქალაქის გათავისუფლება რამდენჯერმე სცადეს, მაგრამ უშედეგოდ.
