მოსკოვი ვალუტის გადაცვლის ახალ რეგულაციებს აწესებს. 27 დეკემბრიდან ვალუტის შეძენისა და გაყიდვისას 15 ათას რუბლზე მეტი თანხის გადახურდავების შემთხვევაში რუსეთის მოქალაქეებმა სრული იდენტიფიკაცია უნდა გაიარონ. მათ ისეთივე პროცედურების გავლა მოუწევთ, როგორსაც ბანკებში ანგარიშის გახსნისას გადიან. ცენტრალური ბანკის განმარტებით, ახალი რეგულაციები მიზნად ფულის გათეთრებისა და ფინანსური ტერორიზმის პრევენციას ისახავს. მსოფლიო ბაზარზე ნავთობის ღირებულების დაცემამ რუსეთში ეროვნული ვალუტის ინფლაცია გამოიწვია. დღეისათვის დოლარის კურსი რუსეთში 70,93 რუბლს შეადგენს, ევროს ღირებულება კი 77,54 რუბლია.
