"ერთიანი ნაციონალური მოძრაობის" საერთაშორისო მდივანი გიგა ბოკერია მიიჩნევს, რომ პრემიერ-მინისტრის შეცვლა ქვეყანას ვერაფერს სასიკეთოს ვერ მოუტანს.
"აბსოლუტურად ლოგიკურია, რომ ამ უმძიმესი კრიზისის ფონზე, იმ ფონზე, როდესაც ხალხი გაღარიბდა, ლარი დაეცა, უმუშევრობა, კრიმინალი გაიზარდა, როცა არანაირი ხედვა არ აქვს ამ მთავრობას მომავლის, პრემიერ-მინისტრი და მისი კაბინეტი გადადგეს, რადგან სწორედ ამ მთავრობის პოლიტიკამ შეგვიყვანა უმძიმეს კრიზისში და დაგვაყენა უფსკრულისკენ მიმავალ გზაზე”, - განაცხადა ბოკერიამ.
მან ასევე აღნიშნა, რომ პრემიერის ცვლილება იმ პირობებში, როდესაც ქვეყანაში ყველა გადაწყვეტილებას იღებს ბიძინა ივანიშვილი არაფერს ცვლის.
„ჩვენ ყველამ ძალიან კარგად ვიცით, რომ ღარიბაშვილი არის უბრალო მარიონეტი და ყველა მნიშვნელოვან გადაწყვეტილებას იღებს ბიძინა ივანიშვილი. ის არის ერთპიროვნული მმართველი. სწორედ მან შექმნა ის პოლიტიკა, რომელმაც ამ უმძიმეს ვითარებაში ჩააყენა ქვეყანა. ამიტომ, ღარიბაშვილის გამოცვლა, მისი გადაყენება ვერაფერ სასიკეთოს ვერ მოუტანს ჩვენს ქვეყანას", -განაცხადა ბოკერიამ.
ბოკრიამ აღნიშნა, რომ რეალური ცვლილებებისთვის აუცილებელია ბიძინა ივანიშვილი ჩამოშორდეს ქვეყნის მართვას.
"ამის დემოკრატიული პროცედურა არის არჩევნები. ვინ იქნება საქართველოს პრემიერ-მინისტრი, ამ გადაწყვეტილებას უნდა იღებდეს არა ერთპიროვნულად ოლიგარქი, არამედ ქართველი ხალხი არჩევნების გზით", - აღნიშნა ბოკერიამ.
შეგახსენებთ, რომ დილიდან ვრცელდება ინფორმაცია პრემიერ-მინისტრის სავარაუდოდ გადადგომის შესახებ.
