დღევანდელმა კვლევებმა ნათლად აჩვენა, რომ თავისუფალ დემოკრატებს აქვთ მზრდადი რეიტინგი, - განაცხადა ”თავისუფალი დემოკრატების” ერთ-ერთმა ლიდერმა ირაკლი ჩიქოვანმა.
მისი თქმით, ყველა ბოლო კვლევა აჩვენებს, რომ „თავისუფალი დემოკრატების“ მხარდამჭერთა რიცხვი სტაბილურად იზრდება
”დღევანდელმა კვლევებმა ნათლად აჩვენა, რომ თავისუფალ დემოკრატებს აქვთ მზრდადი რეიტინგი. აბსოლუტურად ყველა ბოლო კვლევა აჩვენებს, რომ ჩვენი, „თავისუფალი დემოკრატების“ მხარდამჭერთა რიცხვი სტაბილურად იზრდება და ის ადამიანები, რომლებსაც არ ქონდათ გადაწყვეტილი თუ ვისთვის დაეჭირად მხარი, უჭერენ „თავისუფალ დემოკრატებს“. ჩვენ, დარწმუნებული ვართ, რომ ეს ციფრი კიდევ გაიზრდება უახლოეს პერიოდში. აქვე ხაზი მინდა გავუსვა, რომ სხვა დანარჩენ ორ პარტიას რეიტინგი უმცირდება. ჩვენ გვქონდა წვდომა სხვა კვლევებთანაც, რომლებიც რეალურად ადასტურებს და იმეორებს იგივე შედეგებს რაც არის NDI-ის კვლევაში”, - განაცხადა ირაკლი ჩიქოვანმა.
შეგახსენებთ, რომ ეროვნულ-დემოკრატიული ინსტიტუტის (NDI) კვლევის თანახმად, ხვალ რომ საპარლამენტო არჩევნები იყოს, "ქართულ ოცნებას" ხმას გამოკითხულთა 16% მისცემდა, ხოლო "ნაციონალურ მოძრაობას" 10%. გამოკითხულთა 35% აცხადებს, რომ ჯერ არ იცის. კითხვაზე პასუხის გაცემაზე უარი განაცხადა გამოკითხულთა 15%-მა. 7% კი აცხადებს, რომ ხმას "თავისუფალ დემოკრატებს" მისცემდა.
კითხვაზე, "ხვალ რომ არჩევნები იყოს რომელი პარტია გაიმარჯვებდა", გამოკითხულთა 33% აცხადებს, რომ "ქართული ოცნება", 9% აცხადებს, რომ "ნაციონალური მოძრაობა", ხოლო 5% "თავისუფალ დემოკრატებს" ასახელებს.
ეროვნულ-დემოკრატიული ინსტიტუტის (NDI) ბოლო კვლევის საველე სამუშაოები ჩატარდა 17 ნოემბერი-7 დეკემბრის პერიოდში. საქართველოს მასშტაბით გამოიკითხა 1881 ადამიანი.
