პრეზიდენტის საპარლამენტო მდივანი გიორგი კვერენჩხილაძე გაუგებარს უწოდებს მოწმეთა დაკითხვის ახალი წესის კიდევ ერთხელ გადავადებას. როგორც მან ჟურნალისტებთან განაცხადა, გაურკვევლობას ბადებს, რატომ არ მოხდა მოწმეთა დაკითხვის ახალი წესის ბოლო გადავადებიდან გასული 2-წლიანი პერიოდის რაციონალურად გამოყენება.
,,გადავადების მიზეზად საკომიტეტო თუ პლენარული სხდომების დროს დასახელდა სასამართლო რესურსების გაზრდის, ასევე გარკვეული საბიუჯეტო რესურსების მოძიების აუცილებლობა, რის თაობაზეც საუბარია კანონპროექტის განმარტებით ბარათშიც. ამასთან დაკავშირებით გაურკვევლობას ბადებს რამდენიმე გარემოება, პირველ რიგში კი ის, თუ რატომ არ მოხდა დროის უფრო რაციონალურად გამოყენება და საჭირო მატერიალური თუ სამართლებრივი რესურსების მოძიება, როცა აღნიშნული ნორმის ბოლო გადავადებიდან თითქმის 2 წელია გასული. ასევე გაურკვეველია და კითხვებს ბადებს ისიც, რომ მოწმეთა დაკითხვის 2009 წელს მიღებული ახალი წესი უკვე მეხუთედ გადავადდა და ეს მოხდა იმ ფონზე, როცა საკითხი ეხება საკმაოდ მნიშვნელოვან მოვლენას", - განაცხადა კვერენჩხილაძემ.
შეგახსენებთ, პრეზიდენტმა მოწმეთა დაკითხვის წესის 20 თებერვლამდე გადავადებას გუშინ ხელი მოაწერა.
