„ნაციონალური მოძრაობის“ წევრი მიხეილ მაჭავარიანი იმედოვნებს, რომ რუსეთთან უვიზო მიმოსვლას ევროპის ვიზალიბერალიზაცია დაასწრებს.
როგორც ჟურნალისტებს მაჭავარიანმა განუცხადა, რუსეთი ოკუპანტი ქვეყანაა.
„იმედი მაქვს, რომ ამ საკითხს ევროპის ვიზა-ლიბერალიზაცია დაასწრებს. სავიზო რეჟიმი ცალმხრივად გაუქმებულია და საქართველოსთვის ამან დადებითი შედეგი მოიტანა, რადგან ქვეყანაში ბევრი რუსი ტურისტი ჩამოდის. ზაქარეიშვილისგან განსხვავებით ვთვლი, რომ პუტინი საქართველოს მტერია და არ ვთვლი, რომ ის ამას საქართველოს მიმართ მოჭარბებული სიყვარულით აკეთებს. საქართველოს მოსახლეობამ ევროპისკენ უნდა გაიხედოს და არა ჩრდილოეთისკენ, რადგან დიდი ხანია, ჩრდილოეთიდან მზე აღარ ამოდის“, - დასძინა მაჭავარიანმა.
რუსეთის ფედერაციის პრეზიდენტმა ვლადიმერ პუტინმა დღეს გამართულ პრესკონფერენციაზე, ქართველი ჟურნალისტის შეკითხვის საპასუხოდ დაადასტურა, რომ რუსეთი მზად არის საქართველოსთან სავიზო რეჟიმი გააუქმოს.
