საქართველოს პრეზიდენტი გიორგი მარგველაშვილი ადასტურებს, რომ ალეკო ელისაშვილმა, შეწყალების კომისიის თავმჯდომარეობის პერიოდში, მესიჯები წააკითხა. ამის შესახებ საქართველოს პრეზიდენტის მრჩეველმა კახა კოჟორიძემ ისაუბრა.
"იმ პერიოდში, რა პერიოდზეც ალეკო ელისაშვილი საუბრობს, მე პრეზიდენტის ადმინისტრაციაში არ ვმუშაობდი და, შესაბამისად, მე ამ შეხვედრას არ ვესწრებოდი, თუმცა ალეკოს გაკეთებული განცხადების შემდეგ მე დავინტერესდი ამ თემით და ვკითხე პრეზიდენტს, მსგავსი სახის შეხვედრა მართლა შედგა თუ არა. პრეზიდენტმა მითხრა, რომ ასეთი შეხვედრა შედგა. ალეკო ამ კუთხით მართალს ამბობს. მართალს ამბობს იმ კუთხითაც, რომ პრეზიდენტს ნამდვილად წააკითხა მესიჯები", - თქვა კოჟორიძემ.
როგორც კოჟორიძე ამბობს, თავად მან აღნიშნული მესიჯების შინაარსი არ იცის.
"დიახ, პრეზიდენტი ადასტურებს, რომ მას ალეკო ელისაშვილმა ნამდვილად წააკითხა მესიჯები, თუმცა მე არ ვიცი ამ მესიჯების შინაარსი. მართალია ალეკო იმ შემთხვევაშიც, როცა ამბობს, რომ ის ესაუბრა პრეზიდენტის ადმინისტრაციის უფროსსაც. მე ვიცი არა მხოლოდ ალეკო ელისაშვილისგან, არამედ პრეზიდენტისგან", - აღნიშნა კოჟორიძემ.
თბილისის საკრებულოს დეპუტატი ალეკო ელისაშვილი პროკურატურას უნდობლობას უცხადებს. ელისაშვილი ამბობს, რომ ტელეფონში რომელიც პროკურატურას გადასცა იყო მესიჯები.
"ეს მესიჯები არის ერთი დეტალი ძალიან დიდი ბინძური საქმის. კატეგორიული ტონით იყო მოთხოვნა, როგორ გვაიგნორებ და როგორ არ გაგაქვს განხილვისთვისო. მე ადმინისტრაციის თანამშრომლებს, ასევე პრეზიდენტს და ზვიად ქორიძეს ვესაუბრე. პოლიტიკურ მოთამაშედ გადაიქცა პროკურატურა. მესმის ციტატები ჩემი ჩვენებიდან, რომელსაც პოლიტიკოსები ახმოვანებენ. მერე ეს განცხადება. მე მინდა, ვთხოვო პრეზიდენტს, დაადასტუროს ან უარყოს, წავაკითხე თუ არა მესიჯები, გავაცანი თუ არა, ესეც თქვას. ვთხოვ ადამიანურად.
"ქართული ოცნება“ ნაციონალური მოძრაობის გზას დაადგა. ეს ძალიან ბინძური საქმეა. ყველანი დაირაზმნენ ალეკო ელისაშვილის და ჩემი ტელეფონის წინააღმდეგ. მე არ მეშინია იმიტომ, რომ მართალი ვარ. მე უკან არ დავიხევ. არავის არაფერს არ შევარჩენ," - აცხადებს ალეკო ელისაშვილი.
გუშინ პროკურორმა კოკა კაციტაძემ ჟურნალისტებს განუცხადა, რომ ალეკო ელისაშვილის მიერ პროკურატურაში მიტანილ მობილურ ტელეფონში არ აღმოჩნდა იმ მაღალჩინოსნების მესიჯები, რომლებსაც ის ასახელებს. ელისაშვილი კი პროკურატურას უნდობლობას უცხადებს.
