ე.წ. კოკაინის საქმეზე მსჯავრდებული ანასტასია ზაუტაშვილი აცხადებს, რომ თავად ყოველთვის გამართლებას ითხოვდა, ხოლო შეწყალების მოთხოვნა ელისაშვილმა ურჩია. მსჯავრდებული ჟურნალისტებთან ადვოკატმა ტელეფონით დღეს დააკავშირა, სადაც მან ასევე კატეგორიულად უარყო შეწყალების მოთხოვნით თანხის შეთავაზება. "არასოდეს არ მითხოვია შეწყალება. ყოველთვის ვითხოვდი გამართლებას. პროკურატურა ჩემს საქმეს გადახედავს და თვითონ გამამართლებს. როდესაც ალეკო ელისაშვილი გახდა შეწყალების კომისიის თავმჯდომარე, იგი შემოსული იყო ციხეში. ამას ესწრებოდნენ სხვა მსჯავრდებულებიც. მან თქვა, რომ ჩემს საქმეს იცნობს და მითხრა, რომ ადვოკატებს მიეტანათ კომისიაში განცხადება, რომ უდანაშაულო ვარ, რის შემდეგაც პრეზიდენტს თვითონ შეუტანდა ჩემს საქმეს. სწორედ ამის შემდეგ გადავწყვიტე შეწყალების შესახებ განცხადება დამეწერა და ამის შემდეგ მოვიკითხე მანანა კობახიძესთან ჩემი საქმე. მანამდე შეწყალება არ მითხოვია. ვითხოვდი გამართლებას", - განაცხადა ზაუტაშვილმა.
რაც შეეხება ეკა ბესელიას, ზაუტაშვილმა მის მიმართ უკმაყოფილება გამოთქვა და აღნიშნა, რომ ბესელია მათ საქმეზე ყოველთვის უმოქმედო იყო.
მსჯავრდებული აცხადებს, რომ იგი უკანონო პატიმარია და მხოლოდ იმიტომ ზის ციხეში, რომ იძულების მიუხედავად წარდგენილი ბრალდება არ აღიარა.
შეგახსენებთ, ანასტასია ზაუტაშვილი ე.წ. კოკაინის საქმეზე 2010 წელს სხვა პირებთან ერთად დააკავეს და უმაღლესი სასჯელი მიუსაჯეს.
