ოდესის გუბერნატორი კიდევ ერთ უკრაინელ მაღალჩინოსანს დაუპირისპირდა. პრემიერ იაცენიუკის შემდეგ მისი კრიტიკის ობიექტი შინაგან საქმეთა მინისტრი გახდა. ეს მას შემდეგ მოხდა, რაც რეფორმების ეროვნული საბჭოს სხდომაზე ავაკოვმა სააკაშვილს წყალი შეასხა. ინციდენტს არსენი იაცენიუკიც ესწრებოდა, რომელმაც მხარი ავაკოვს დაუჭირა. როგორც სააკაშვილი ირწმუნება, პრემიერმა და შინაგან საქმეთა მინისტრმა მას სიტყვიერი შეურაცხყოფაც მიაყენეს. “ავაკოვმა, რომელიც პრაქტიკულად არაფორმალურ შეიარაღებულ ფორმირებებს აფინანსებს, ყველას თვალწინ თავს უფლება მისცა დამმუქრებოდა, იაცენიუკმა კი გასტროლიორი მიწოდა. მე არსად წასვლას არ ვაპირებ და ამ ადამიანებს უკრაინის გაქურდვის უფლებას არ მივცემ,”-განაცხადა სააკაშვილმა.
