საქართველოს მთავარი პროკურორი ირაკლი შოთაძე აცხადებს, რომ ალეკო ელისაშვილის ბრალდებებზე დაწყებულ გამოძიებასთან დაკავშირებით, ოცამდე მოწმეა დაკითხული და პროცესი გრძელდება.
პროკურორმა ჟურნალისტებთან ასევე განაცხადა, რომ გამოძიებასთან დაკავშირებით, ამომწურავი ინფორმაცია მიეწოდება საზოგადოებას.
"მიმდინარეობს ალეკო ელისაშვილის დაკითხვა იმ გარემოებებთან დაკავშირებით, რომელიც წარმოიშვა გამოძიების პროცესში. ასევე დაგიდასტურებთ, რომ გამოძიების მიერ დაკითხულები არიან დეპუტატები მანანა კობახიძე და ეკა ბესელია. ასევე, დაკითხულია ოცამდე მოწმე. თუმცა, ჯერ კიდევ არის რიგი საგამოძიებო მოქმედებები, რომელთა ამოწურვისას საქმეზე ჭეშმარიტების დადგენის შემდეგ შესაბამის ინფორმაციას ამომწურავად მივაწვდით საზოგადოებას", - აღნიშნა ირაკლი შოთაძემ.
მისივე განცხადებით, ელისაშვულის ბადაშვილთან და გოგაძესთან შეხვედრის შესახებ, მედიის საშუალებით გაიგო. თუმცა, მთავარი პროკურორის თქმით, გამოძიება ამ მიმართულებითაც ჩატარდება.
მისი ინფორმაციით, შეხვედრაზე, რომელსაც ესწრებოდნენ ნათია სუხიაშვილი, გიორგი ბადაშვილი, გიორგი გოგაძე, რაიონული პროკურორი და დეპარტამენტის უფროსის მოადგილე, საუბარი შეეხებოდა სხვა სისხლის სამართლის საქმეს და საუბარი არ ყოფილა შეწყალების კომისიის საქმიანობაზე.
,,ამ ადამიანების განცხადება წინააღმდეგობაში მოდის ელისაშვილის ჩვენებასთან..ფაქტია, ელისაშვილს შესაძლებლობა ჰქონდა, ამ ხნის განმავლობაში პროკურატურისთვის წერილობით მოემართა. მიუხედავად იმისა, რომ სხვა ფაქტებზე მას წერილობით მომართული აქვს პროკურატურისთვის, ამ საკითხთან დაკავშირებით მას ჩვენთვის არ მოუმართავს", - განაცხადა შოთაძემ.
