არასამთავრობო ორგანიზაცია „სამართალდამცავთა დაცვის ლიგა“ შეწყალების სკანდალთან დაკავშირებით სპეციალრ განცხადებას ავრცელებს, და პოლიტდევნილთა სიაში შეყვანილი ლევან ფხაკაძის საქმის დეტალებზე საუბრობს.
სამართალდამცავთა დაცვის ლიგის განცხადებას უცვლელად გთავაზობთ:
„არასამთავრობო ორგანიზაცია „სამართალდამცავთა დაცვის ლიგა“ ეტაპობრივად გააცნობს საზოგადოებას, სავარაუდო კორუფციულ გარიგებების შედეგად, საეჭვო ვითარებაში, გარკვეულ პირთა ხელშეწყობით პოლიტდევნილთა და პოლიტპატიმართა სტატუსის მინიჭების ფაქტებს.
პოლიტდევნილთა 25 კაციან სიაში, მეშვიდე ნომრით შეყვანილია ლევან ფხაკაძე, რომელსაც პოლიტიკური დევნილის სტატუსი მიენიჭა. ლევან ფხაკაძე აწუხებდა გოგონას, რომელიც მას არ თანაუგრძნობდა. თაყვანისმცემლის თავხედობისგან შეწუხებულმა გოგონამ, დაცვა საკუთარ ძმას - მოქ. მიხეილ ზირაქაძეს თხოვა, რომელმაც 2007 წლის 24 სექტემბერს, ფხაკაძესთან კონფლიქტი, რომ თავიდან აეცილებინა, ფხაკაძესთან შეხვედრაზე, საკუთარი დის სახლთან, მეუღლისა და სიმამრის თანმხლებით მივიდა. სიტყვიერი შეურაცხყოფის შემდეგ, ფხაკაძემ, რომელიც უკანონოდ ატარებდა ცეცხლსასროლ იარაღს, ზირაქაძეს მოსაკლავად მუცლის არეში მიბჯნით ესროლა. ზირაქაძემ გაქცევა სცადა, თუმცა ფხაკაძე მას დაედევნა და კიდევ ორჯერ ესროლა. ფხაკაძემ ზირაქაძეს სულ 8 ტყვია ესროლა, რომლიდანაც, ზირაქაძეს სამი მოხვდა და უმძიმესად დაიჭრა. ფხაკაძე შემთხვევის ადგილიდან მიიმალა. მის მიმართ აღიძრა სს საქმე, საქ. სსკ-ის 19, 108-ე და 236-ე მუხლებით გათვალისწინებული დანაშაულის ჩადენისათვის და მასზე გამოცხადდა ძებნა. გამოძიებით, ლევან ფხაკაძის ბრალეულობა სრულიად დადასტურდა და მას სასამართლომ დაუსწრებლად 14 წლით თავისუფლების აღკვეთა მიუსაჯა, კერძოდ 10 წელი და 6 თვე - მკვლელობის მცდელობისათვის, 3 წელი და 6 თვე ცეცხლსასროლი იარაღის უკანონო ტარება-გამოყენებისათვის. მოხდა სრულიად წარმოუდგენელი ფაქტი და ლევან ფხაკაძე, რომელმაც საზოგადოებას თავი, დადასტურებული, თავხედური დანაშაულით დაამახსოვრა, პოლიტიკურ დევნილად შერაცხეს. ფხაკაძის მიერ, ამ აშკარა დანაშაულის ჩადენის გათვალისწინებითაც, გამორიცხული არ გახლავთ, რომ პირები, რომლებმაც ის პოლიტდევნილთა სიაში შეიყვანეს უანგაროდ არ მოქმედებდნენ“ ნათქვამია გავრცელებულ განცხადებაში.
