პარლამენტის ევროინტეგრაციის კომიტეტის თავმჯდომარის, ლევან ბერძენიშვილის განცხადებით, თავის დროზე, ნუგზარ ბოჭორიშვილი „რესპუბლიკური პარტიის“ წევრი ნამდვილად იყო, მაგრამ მისი რეპრესირება და დამნაშავედ ცნობა პარტიის საქმიანობასთან დაკავშირებული არ ყოფილა.
როგორც ჟურნალისტებს ბერძენიშვილმა განუცხად, „რესპუბლიკური პარტია“ ბოჭორიშვილს პოლიტიკურ პატიმრად ვერ მიიჩნევდა.
„ის არ დასჯილა და არ ყოფილა კანონის ინტერესის საგანი იმის გამო, რომ ის პარტიის წევრი იყო. რესპუბლიკელობა აქ არაფერ შუაშია. თუკი გარკვეული მტკიცებულებები არსებობს, პროკურატურამ ეს საქმე ბოლომდე უნდა მიიყვანოს“, - განაცხადა ბერძენიშვილმა.
პარლამენტის ვიცე-სპიკერმა, მანანა კობახიძემ განაცხადა, რომ ნუგზარ ბოჭორიშვილი „რესპუბლიკური პარტიის“ წევრი იყო, როცა მის მიმართ დევნა მიმდინარეობდა.
„ეს ცნობა და დოკუმენტი არსებობდა, ეს ცნობა თავად „რესპუბლიკურმა პარტიამ“ გასცა და მას მოთხოვნა ჰქონდა, რომ მისი საქმე როგორც „რესპუბლიკური პარტიის“ წევრის ისე განხილულიყო“, - განაცხადა კობახიძემ.
