პარლამენტის თავდაცვის კომიტეტის თავმჯდომარის, ირაკლი სესიაშვილის განცხადებით, თუკი ალეკო ელისაშვილის მიზანი იყო, რომ სიკეთე გაეკეთებინა და კორუფციული ფაქტი გამოეაშკარავებინა, მას ვინმეს კაბინეტში კი არ უნდა ეჭორავა, მას პროკურატურაში ოფიციალური განცხადება უნდა დაეწერა.
როგორც ჟურნალისტებს სესიაშვილმა განუცხადა, საზოგადოება გამოძიებას უნდა დაელოდოს.
მისი შეფასებით, შეწყალების კომისიის ინტერესში უნდა იყოს, თუკი თანამდებობის პირები პროცესში საკუთარ პოზიციას აფიქსირებენ.
„ღრმად ვარ დარწმუნებული, ის რა ინფორმაციაც ვრცელდება, ამას უფრო ჭორაობის სახე აქვს, ვიდრე ეს რაიმე რეალური ბრალდება იყოს. ნებისმიერ მოქალაქეს უფლება აქვს, რომ შეწყალება ითხოვოს და თუკი თანამდებობის პირები შეწყალების პროცესში საკუთარ პოზიციას აფიქსირებენ, ეს კომისიის ინტერესში უნდა იყოს, რომ ისინი სიტუაციაში უკეთ გაერკვნენ და ამაში დანაშაული არაფერი არ არის. დასახელებულ პირებთან მიმართებაში კატეგორიულად გამოვრიცხავ, რომ საქმე კორუფციასთან, გარიგებასთან და ფინანსურ ინტერესებთან გქვონდეს. იმის ნაცვლად, რომ ელისაშვილს ოფიციალურად ემოქმედება, საქმე ჩვენი ღირსების შელახვასთან გვაქვს“, - აცხადებს სესიაშვილი.
კანონმდებელი ფიქრობს, რომ ყველაფერს თავისი სახელი უნდა დაერქვას და ეს ყველაფერი ღიად უნდა ითქვას, ვიდრე საუბარი იმ დონეზე გაიმართოს, ვინ ვის კაბინეტში იჭორავა.
„ნებისმიერი თანამდებობის პირის განცხადება შინაგან პასუხისმგებლობას უნდა ეფუძნებოდეს. შეიძლება ბევრი რაღაც ვიცოდეთ, მაგრამ უდანაშაულობის პრეზუმციის პრინიპები არსებობს, რომელიც უნდა დავიცვათ. სამწუხაროდ, ელისაშვილის განცხადებებიდან პასუხისმეგებლობა ვერ დავინახე. როგორც ჩანს, ამ სიტყვების უკან ვალდებულებაა, რომ ეს ყველაფერი დამტკიცდეს და იმის ნაცვლად, რომ ელისაშვილს პასუხისმგებლობა აეღო, ის ხელს პროკურატურისკენ იშვერს, კეთილი ინებოს და საქმე გამოიძიოსო. თუკი მტკიცებულება არ არსებობს, ასეთი საქციელი უპასუხისმგებლობაა“, - განაცხადა სესიაშვილმა.
შეგახსენებთ, შეწყალების კომისიის ყოფილი თავმჯდომარე ალეკო ელისაშვილი თანამდებობის პირებს პატიმარტა შეწყალები პროცესში ზეწოლაში ადანაშაულებს. იგი ასევე საუბრობს კორუფციულ გარიგებებზე შეწყალებისა და პოლიტპატიმართა სიის ფორმირების პროცესში. საქმეზე მიმდინარეობს გამოძიება.
