იუსტიციის მინისტრი ,,თავისუფალი დემოკრატების“ მიერ გამართულ საპროტესტო აქციას გამოეხმაურა და განაცხადა, რომ სამწუხაროდ, პარტიის ერთი ნაწილი უკან სვლის რეჟიმშია.
,,დასანანია, რომ მათ მოუწიათ თავიდან ამ აქციის გამართვა იუსტიციის სახლთან და მერე გაიგეს, რომ თურმე იუსტიციის მინისტრი იუსტიციის სამინისტროში ზის. მაგრამ, ალბათ, ამაშიც დაიხვეწებიან მომავალში. როგორც ჩანს, შეეტყო ჩემი პარტიიდან წასვლა, აღარ იციან სად ვზივარ. რაც შეეხება თვითონ სლოგანებს ამ აქციისა, მე ვხედავ, რომ სამწუხაროდ, "თავისუფალი დემოკრატების" პარტიის ერთი ნაწილი უკან სვლის რეჟიმშია, პარტიას უკან ექაჩება და არ აძლევს განვითარების საშუალებას", - განაცხადა თეა წულუკიანმა.
მისივე თქმით, როდესაც ის იყო პარტია "თავისუფალი დემოკრატების" წევრი იუსტიციის სამინისტროს კიბეებზე მას მოუწყვია მაშინ აქცია ზურაბ ადეიშვილის წინააღმდეგ გირგვლიანის საქმეზე.
,,შედარება თვითონ გააკეთეთ, დღეს "თავისუფალი დემოკრატების" პარტიის ერთი ნაწილი აპროტესტებს მთავარი პროკურორის გამჭვირვალე წესით შერჩევას“, - დასძინა მინისტრმა
"თავისუფალი დემოკრატების" ახალგაზრდულმა ორგანიზაციამ იუსტიციის სამინისტროსთან საპროტესტო აქცია გამართა. აქციის მონაწილეებს თან ჰქონდათ პლაკატები წარწერებით "ჩაწყობილი არჩევნები" ,,ვერგანხორციელებული დეპოლიტიზაცია" ,,სტრასბურგიდან ელიტა-ბურჯამდე" ,,იპოვე ერთი განსხვავება მაინც" ,,წულუკიანი გამპრავებელი" ,,მარიონეტები" ,,მართული გენპროკურორი".
ახალგაზრდა "თავისუფალი დემოკრატები" მთავარი პროკურორობის კანდიდატად ირაკლი შოთაძის წარდგენას აპროტესტებენ.
