პარლამენტის თავმჯდომარის დავით უსუფაშვილის აშშ-ში ვიზიტს მისი მეუღლე, თავდაცვის მინისტრი თინა ხიდაშელი ,,მაესტროს“ ეთერით გამოეხმაურა და განაცხადა, რომ გაუხმაურებელ ვიზიტები მას უკეთ გამოსდის. ხიდაშელმა ამის მაგალითად ერთი თვის წინ, მისი აშშ-ში განხორციელებული ვიზიტი დაასახელა.
,, ხელისუფლების წარმომადგენლები ძალიან ხშირად ვიმყოფებით ვიზიტებში, რომელიც მედიაში არ ხმაურდება. მათ შორის, არის ქვეყნის პარლამენტის თავმჯდომარეც, როგორც ხელისუფლების ერთ-ერთი მთავარი პირი. მე თვითონაც შემიძლია ახლავე გითხრათ, აქვე გაგიმხილოთ, მეც ერთი თვის წინ ვიყავი აშშ-ში იმავე ქალაქში, იმავე ქუჩებზე, ოღონდ ეს მაშინ შეუმჩნეველი დარჩა და არც ერთი კამერის ფოკუზში არ მოხვედრილა, ეტყობა მე უკეთესად მოვახერხე ამის გაკეთება, ვიდრე დათომ. ეს არის ძალიან ჩვეულებრივი მუშა პროცესი აშშ ჩვენი სტრატეგიული პარტნიორია და ჩვენ მათთან გვაქვს ურთიერთობა მუდმივად, ყოველდღე როგორც ღია ფორმატებში, ისე მედიისთვის დახურულ ფორმატში. ეს არის ჩვეულებრივი, ნორმალური პროცესი ბევრი რამე ხდება ჩვენს ურთიერთობებში რაზეც ტელევიზორში არ ვლაპარაკობთ იმიტომ, რომ პირველ რიგში, ყველაზე მთავარი და მნიშნელოვანი არის ქვეყნის უსაფრთხოების ინტერესები,“ – განაცხადა მინისტრმა და დასძინა, რომ ქვეყნის უსაფრთხოების ინტერესები ხანდახან მოითხოვს, კამერების მიღმაც მიმდინარეობდეს საუბრები.
