თავდაცვის კომიტეტის თავმჯდომარე ირაკლი სესიაშვილი ფიქრობს, რომ „პატრიოტთა ალიანსის“ მიერ გამოცხადებული შიმშილობის აქცია რაღაც პოლიტიკურ ინტერესს ემსახურება და საკუთარი ძალის დემონსტრირება ხდება.
როგორც „“ჯი-ეჩ-ენ“-ს სესიაშვილმა განუცხადა, ქვეყანაში ისეთი მდგომარეობა არ არის, რომ ვიღაცას შიმშილობით რაღაცის დამტკიცება სჭირდებოდეს.
მისი თქმით, ის მოშიმშილეების ჯანმრთელობაზე ნერვიულობს.
„არჩევნები რომ გაყალბებულიყო, მტკიცებულებები იარსებებდა და ამას ყურადღების მიღმა სასამართლო არ დატოვებდა. შიმშილობა უკიდურესი ფორმაა, როცა დიალოგი არ ჭრის. პირდაპირ შიმშილობის დაწყება სწორად არ მიმაჩნია. თითოეული მათგანის ჯანმრთელობა ღირებულია და ამ ადამიანებს თავად პარტიის ლიდერები უნდა უფრთხილდებოდნენ. ამ ქვეყანაში შიმშილობის დრო დასრულდა, რადგან ყველას კარი ღიაა და დიალოგით რაღაცის მოგვარება შეიძლება. სწორი არ არის, რომ მე ასე მინდა და თუ არ გაკეთდება, ვიშიმშილებო“, - განაცხადა სესიაშვილმა.
მთავრობის კანცელარიასთან, „პატრიოტთა ალიანსის“ წევრების შიმშილობის აქცია გრძელდება, რომლებიც ამ ფორმით საგარეჯოში, შუალედური არჩევნების შედეგებს აპროტესტებენ. ისინი მიიჩნევენ, რომ აღნიშნულ ოლქში არჩევნები გაყალბდა.
