პარლამენტის ვიცე-სპიკერი ზვიად ძიძიგური „პატრიოტთა ალიანსის“ ლიდერებს მოუწოდებს შიმშილობის აქცია შეწყვიტონ. როგორც „ჯი-ეჩ-ენ“-ს ძიძიგურმა განუცხადა, ის ხშირად ყოფილა, შიმშილობის აქციის მონაწილეც და პროტესტის ამ ფორმის წამომწყებიც. თუმცა, იგი მიიჩნევს, რომ შიმშილობის წამოწყება ადვილია, მაგრამ ,,იქედან გამოსვლა ურთულესი“.
„დამოკიდებულება, რომ შიმშილობის დაწყებით ხელისუფლებამ რაღაცა პოზიტიური ნაბიჯები გადადგას, არასწორია. ეს იმას ნიშნავს, რომ ვისაც რამეს შეცვლა მოუნდება, უნდა იშიმშილოს. ხელისუფელბა ამას არ გააკეთებს. მოშიმშილეებზე ისეთი ზემოქმედება უნდა მოვახდინოთ, რომ პროცესი უმტკივნეულად გავაგრძელოთ. საარჩევნო რეფორმის გასატარებლად უკიდურესი ფორმები არ არის საჭირო. ამ პროცესების მონაწილე მეც ვიყავი, რადგან მაშინ, სხვანაირად არ გამოდიოდა, მაგრამ ახლა ასეთი რადიკალიზმი საჭირო აღარ არის. ყველანი ვხედავთ, რომ არჩევნები სიკვდილ-სიცოცხლის საკითხი აღარ არის, როგორც ეს შევარნაძე-სააკშვილის ხელისუფლების პირობებში იყო. ყველა უფრო დამშვიდებულია და ცივილური დიალოგით ყველანაირ პოზიციამდე მისვლა შესაძლებელია, მაგრამ არა შიმშილობით და იმით, რასაც პატრიოტთა ალიანსის წევრები აკეთებენ“, - დასძინა ძიძიგურმა.
„პატრიოტთა ალიანსის“ წევრები შიმშილობის აქციას მთავრობის კანცელარიასთან აგრძელებენ. ისინი მიიჩნევენ, რომ შუალედური არჩევნები გაყალბდა.
