ფრაქცია „ქართული ოცნების“ თავმჯდომარის, გია ვოლსკის განცხადებით, მას საქართველოში არცერთი მედია-საშუალება არ ეგულება ისეთი, რომელიც მთავრობის მხარდასაჭერად გამიზნულ, ჩამოყალიბებულ, პოზიტიულ გადაცემებს ან სიუჟეტებს აკეთებს.
როგორც ჟურნალისტებს ამერიკის ელჩის საქართველოში, იან კელის განცხადებების საპასუხოდ ვოლსკიმ განაცხადა, სტრატეგიული მიმართულების საკმაოდ ბევრი პროექტია საქართველოში და ქვეყანაში პოზიტიურიც საკმაოდ ბევრი რაღაც ხდება, მაგრამ სახელმწიფოს არცერთი მედია-საშუალებისთვის არ დაუვალებია და არ გაუკეთებებია ორგანიზება მთავრობისთვის ხოტბის შესასხმელად.
„ამისთვის მედია არ არის და ასეც გაგრძელდება იმის მიუხედავად, თუ რას იტყვის ბატონი ელჩი“, - დასძინა ვოლსკიმ.
ერთ-ერთი გაზეთისთვის მიცემულ ინტერვიუში იან კელიმ განაცხადა, თუ საბოლოო შედეგი იქნება ის, რომ ოპოზიცია „რუსთავი 2“-ზე საბოლოოდ დაკარგავს წვდომას, ეს არხი გახდება ნეიტრალური, ან კიდევ უარესი - პროსამთავრობო. მისი თქმით, მათ უფლება აქვთ, გააჟღერონ ის მოსაზრებები, რომლებიც შესაძლოა, გამოხატავდეს თუნდაც ნაციონალური მოძრაობის ინტერესებს.
