ხვალ, 13 ნოემბერს, 10:00 საათზე, სასტუმრო ჰოლიდეი ინნ-ში იუსტიციის სამინისტროს მიერ მომზადებული არასრულწლოვანთა მართლმსაჯულების ინოვაციური კოდექსის გასაცნობად საქართველოში 7 ქვეყნის დელეგაციები ჩამოვლენ. დელეგაციის წევრები „არასრულწლოვანთა მართლმსაჯულების კოდექსს“ გაეცნობიან საერთაშორისო კონფერენციაზე − „მართლმსაჯულება ბავშვებისათვის“ საქართველოს არასრულწლოვანთა მართლმსაჯულების კოდექსის მიხედვით“.
კონფერენციის იუსტიციის მინისტრი თეა წულუკიანი გახსნის. მინისტრის პირველი მოადგილე ალექსანდრე ბარამიძე დამსწრეებს „არასრულწლოვანთა მართლმსაჯულების კოდექსის“ მთავარ პრინციპებს გააცნობს.
კონფერენციაში მონაწილეობას მიიღებენ ევროკავშირის ელჩი საქართველოში იანოშ ჰერმანი, „UNICEF“-ის წარმომადგენელი საქართველოში საშა გრაუმანი და მოსამართლე რენატე ვინტერი (ევროკავშირის პროექტის − „სისხლის სამართლის სისტემის რეფორმის მხარდაჭერა საქართველოში“ − ხელმძღვანელი).
