საქართველოს პრეზიდენტის მრჩევლი ადამიანის უფლებათა საკითხებში კახა კოჟორიძე აცხადებს, რომ ავლაბრის სასახლეში დიპლომატიურ კორპუსთან შეხვედრაზე ძირითადი დრო საარჩევნო გარემოზე საუბარს დაეთმო. მისივე თქმით, ელჩებმა აღნიშნეს პრეზიდენტის პოზიტიური როლი სიტუაციის დამშიდებაში.
„ელჩებმა აღნიშნეს პრეზიდენტის პოზიტიური როლი იმ სამი კვირის წინ გაკეთებულ განცხადებიდან გამომდინარე, როდესაც მან მოახერხა დაძაბული სიტუაცია დიალოგის რეჟიმში გადაეტანა და სიტუაცია დამშვიდებულიყო“, - განაცხადა კახა კოჟორიძემ.
მისივე თქმით, კონკრეტული რჩევები კონსტიტუციურ ცვლილებაზე ელჩების მხრიდან არ ყოფილა. ძირითადი მოსაუბრე, პრეზიდენტის მრჩევლის თქმით, იყო გიორგი მარგველაშვილი, რომელმაც საარჩევნო გარემოზე ისაუბრა და იმ პრინციპებზე გაამახვილა ყურადღება, რითაც არჩევნები უნდა ჩატარდეს. ამასთან, კოჟორიძის განცხადებით, პრეზიდენტი არ არის კონკრეტული საარჩევნო მოდელის მხარდამჭერი.
„პრეზიდენტი არის ზოგადად იმ იდეის მხარდამჭერი, რომ სამართლიანი არჩევნები ჩატარდეს და კიდევ უფრო გაუმჯობესდეს ამ თვალსაზრისით საქართველოს კანონმდებლობა, კონსტიტუცია და ასევე, საარჩევნო კოდექსი. საარჩევნო კანონმდებლობის გაუმჯობესების კუთხით არის მოქმედებები განსახორცილებელი და რაც შეიძლება მალე, რათა პოლიტიკურმა სუბიექტებმა დროულად იცოდნენ იმ თამაშის წესები, რომლის მიხედვითაც მათ 2016 წლის არჩევნების დროს უნდა იმოქმედონ“, - განმარტავს კოჟორიძე.
მისივე ტქმით, პრეზიდენტი ეთანხმება იმ აზრს, რომ თავისუფალი, დამოუკიდებელი მედიის გარეშე თავისუფალ, სამართლიან საარჩევნო გარემოზე საუბარი ზედმეტია.
რაც შეეხებათ, თავად ელჩებს, პრეზიდენტთან შეხვედრის შემდეგ, მედიასთან კომენტარები არ გაუკეთებიათ.
