მმართველი გუნდის წევრი ეკა ბესელია იმედოვნებს, რომ საკონსტიტუციო სასამართლოს მოსამართლეები იმ პასუხისმგებლობას კარგად გრძნობენ, რომელიც სასამართლოს სანდოობასთან პირდაპირ კავშირშია.
როგორც ჟურნალისტებს „რუსთავის 2“-ის სარჩელთან და პარლამენტის შუამდგომლობასთან დაკავშირებით ბესელიამ განუცხადა, მართლმსაჯულების ხაზი საკონსტიტუციო სასამართლოზე გადის, რომელიც ბოლო პერიოდში, სწრაფი აქტივობით გამოირჩევა.
დეპუტატის განცხადებით, გასულ წლებში, საკონსტიტუციო სასამართლოს არსებობა იურისტებმაც კი დაივიწყეს.
„კარგია, რომ აქტივობის ტენდენცია ჩანს, მაგრამ ძალიან მნიშვნელოვანი იქნება, რომ საკონსტიტუციო სასამართლომ არც ისე იჩქაროს, რომ შთაბეჭდილება დარჩეს, რომ ეს ყველაფერი დაკავშირებულია ერთ კონკრეტულ დავასთან. სასამართლოს მუშაობის ტემპი სრულიად პროპორციული უნდა იყოს და მან მხარეებს ისეთი სტანდარტი უნდა შესთავაზოს, რომელიც სასამართლოს ნდობას ეჭქვეშ არ დააყენებს“, - განაცხადა ბესელიამ.
საკონსტიტუციო სასამართლომ პარლამენტს „რუსთავი 2“-ის სარჩელზე, ორი მოსამართლის აცილების თაობაზე უარი უთხრა.
