ფრაქცია „თავისუფალი დემოკრატების“ თავმჯდომარის, ირაკლი ჩიქოვანის მოსაზრებით, „რუსთავი 2“-ის სარჩელთან დაკავშირებით, პარლამენტის იურისტების მიერ საკონსტიტუციო სასამართლოში გაგზავნილი შუამდგომლობა პოლიტიკური გადაწყვეტილება არ არის.
როგორც ჟურნალისტებს ჩიქოვანმა განუცხადა, თუ ეჭვი არსებობს იმასთან დაკავშირებით, რომ საკონსტიტუციო სასამართლოს მოსამართლე შესაძლოა, რაღაც პირადი განწყობებით ხელმძღვანელობდეს, ეს აბსოლუტურად მიუღებელია.
„ამასთანავე, კარგად უნდა გვესმოდეს, რომ ეს ადამიანები იმ ფორმატით და იმ კანონის მიხედვით არიან არჩეული, რომელსაც ჩვენი ქვეყნის კანონმდებლობა ითვალისწინებს და ისინი იმოქმედებენ, არა საკუთარი განწყობებით, არამედ რეალურად კანონის უზენაესობის პრინციპებიდან და კონსტიტუციის უზენაესობის პრინციპებიდან გამომდინარე. შეიძლება, საქმე რაღაც სამართლებრივ სვლასთან გვქონდეს, რადგან პარლამენტის იურისტების მხრიდან შუამდგომლობის გაგზავნა არ არის პოლიტიკური გადაწყვეტილება“, - განაცხადა ჩიქოვანმა.
საქართველოს პარლამენტმა საკონსტიტუციო სასამართლოს „რუსთავი 2“-ის სარჩელთან დაკავშირებით, მოსამართლეების აცილების შუამდგომლობით მიმართა.
