პარლამენტის ადამიანის უფლებათა დაცვის კომიტეტის თავჯდომარე ეკა ბესელია ირწმუნება, რომ „რუსთავი 2“-ის მიმდებარე ტერიტორიაზე სათვალთვალო კამერები ტელეკომპანიის თანამშრომლების უსაფრთხოების მიზნით დამონტაჟდა.
როგორც ჟურნალისტებს ბესელიამ განუცხადა, როდესაც პროვოკაციული თუ სხვა ტიპის უკანონო ქმედებების თაობაზე ინფორმაცია ჩნდება, პოლიცია ყველას უნდა იცავდეს.
„თუკი რაიმე ტიპის პროვოკაცია შესაძლებელია, ეს საფრთხეები მინიმუმამდე უნდა დაიყვანონ, რათა მერე კითხვა არ გაჩნდეს - სად იყო ხელისუფლება, ან პოლიცია?! ეს ღონისძიება იმას გულისხმობს, რომ ტელევიზიის უსაფრთხოება დაცული იყოს და პრევენციული ღონისძიებები წინასწარ გატარებული იყოს. თუკი ტელევიზიის შიგნით რაიმე ტიპის დახურული შეხვედრები იქნება, ბუნებრივია, ამ კამერებს წვდომა არ აქვთ. შიდა სამზარეულოში ვერავინ ვერ ჩაერევა, რადგან ამის უფლება არავის აქვს“, - დასძენს ბესელია.
შეგახსენებთ, ტელეკომპანიის გენერალურმა დირექტორმა ნიკა გვარამიამ, რუსთავი 2-ის მიმდებარე ტერიტოიაზე ვიდეოთვალთვალის დაწესების გამო განმარტებები, სპეციალურ ბრიფინგზე მოითხოვა.
