თავდაცვის მინისტრი თინა ხიდაშელი დაინტერესების შემთხვევაში, სამხრეთ კავკსასიასა და ცენტრალურ აზიაში ნატო-ს გენერალური მდივნის სპეციალურ წარმომადგენელს, ჯეიმს აპატურაის რუსთავი 2-ის შესახებ საგამოძიებო კომისიის დასკვნას გააცნობს. ამის შესახებ მინისტრმა სასტუმრო „ჰოლიდეი ინში“ განაცხადა.
„ამ თემაზე არ ვაპირებ მე მასთან საუბარს, მაგრამ იცით, რომ ნებისმიერ კითხვაზე ყოველთვის ვპასუხობ. ამიტომ, სიამოვნებით გავაცნობ მას საგამოძიებო კომისიის დასკვნას ტელეკომპანიების „რუსთავი 2“-ის და „საქართველოს“ შესახებ“, - აღნიშნა თინა ხიდაშელმა.
მისივე თქმით, არის თემები, რომელზე საბრისგანაც პოლიტიკოსებმა თავი უნდა შეიკავონ.
„ეს არის სასამართლო პროცესი, რომელსაც მე არ ვესწრები და რომელზეც მე კომენტარს არ გავაკეთებ, იმიტომ, რომ არსებობს ისეთი ტიპის ღონისძიებები ქვეყანაში, რომელზეც პოლიტიკოსები რაც უფრო მეტად შეიკავებენ თავს, მით უფრო სასარგებლო იქნება თავად იმ პოლიტიკოსისთვის“, - განაცხადა თინათინ ხიდაშელმა.
