პრეზიდენტის მრჩეველი პოლიტიკურ საკითხებში ფიქრია ჩიხრაძე მიიჩნევს, რომ ტელევიზიაზე შეტევას გამართლება არა აქვს, - ამის შესახებ მან ყოფილი პრემიერის ბიძინა ივანიშვილის მიერ რუსთავი 2-ის შესახებ გაკეთებული განცხადების შეფასებისას განაცხადა.
,,თუ ჩვენ გვინდა, რომ დემოკრატიულ ქვეყნად ვიწოდებოდეთ და პერსპექტივაც ასეთი გვქონდეს, რომ დამოუკიდებელ ტელევიზიას, როგორი სარედაქციო პოლიტიკაც არ უნდა ჰქონდეს, არ ექმნებოდეს არანაირი პრობლემა. ამ მხრივ უნდა ვიმოქმედოთ და არა ვთქვათ, რაღაც პოლიტიკურ პროცესებზე ვაკეთებდეთ აპელირებას და ვამართლებდეთ შეტევას ტელევიზიაზე” - განაცხადა ჩიხრაძემ.
შეგახსენებთ, შაბათის ქრონიკისთვის მიცემულ ინტერვიუში ბიძინა ივანიშვილმა განაცხადა, რომ რუსთავი 2-ის წინააღმდეგ მიმადინარე სასამართლო პროცესი არის დავა ორ სუბიექტს შორის.
„დავეთანხმები მთავრობის წევრებს, ეს არის ბრძოლა ორ სუბიექტს შორის, თუმცა „ნაციონალური მოძრაობის“ წევრები და თავად „რუსთავი2“-ის ხელმძღვანელი ყველანაირად ცდილობს დახატოს, რომ ეს არის მთავრობის დაკვეთა და მათ ებრძვის მთავრობა. საერთოდ, საოცარი აჟიოტაჟი არის სასამართლოს ირგვლივ, რეალურად თუ შევხედავთ რა ხდება, საამართლოში ჩივის ქიბარ ხალვაში, „რუსთავი 2“-ის ყოფილი მფლობელი, დავობს საკუთრებაზე. საბედნიეროდ თუ საუბედუროდ, „მაესტროში“ ხდება მსგავსი პროცესები, რამდენადაც მე ვიცი, გამოჟონა ინფორმაციამ, აქციონერების ნაწილი ამბობდა, თითქოს იქაც მთავრობას ხედავდნენ, მაგრამ ეს მიწყნარდა, საბედნიეროდ. მე დარწმუნებული ვარ, მთავრობა არაფერ შუაშია არც ერთ და არც მეორე შემთხვევაში. „მაესტროზე“ მიდის კამათი აქციონერებს შორის და მე როგორც ვიცი, ეს უფრო ადრეა დაწყებული და მიდის კამათი როგორც უნდა მიდიოდეს. დავას ვერ შევაქებ, მაგრამ ეს ხდება, ცხოვრება ასეთია, მიდის დავა და არავითარი აჟიოტაჟი ამას არ ახლავს, რა ხდება „რუსთავი 2“-ში, რატომ არის ასეთი საოცარი ისტერიკა? ჯერ ერთი, სასამართლო პროცესი მიდის, იქნებ მათ სასარგებლოდ წყდება ყველაფერი? უკვე გაკეთდა ის განცხადებები, რომელსაც ვერ ასაბუთებენ, მარჩიელობენ, რომ ასე მოხდება, ასე გადაწყდება“, - აცხადებს ივანიშვილი.
