პარლამენტის ევროინტეგრაციის კომიტეტის თავმჯდომარე ლევან ბერძენიშვილი „ნაციონალურ მოძრაობას“ მოუწოდებს კანონის ფარგლებიდან არ გავიდეს და „ქართულ მაიდანზე“ ოცნებას თავი დაანებოს.
როგორც ჟურნალისტებს ბერძენიშვილმა განუცხადა, არასამთავრობო სექტორი ძალიან კარგად იქცევა, როცა პოლიტიკოსების განცხადებებს ყურადღებას აქცევს, მაგრამ, როცა მოქალაქეები ამბობენ, რომ თერმოსებს მოიმარაგებენ, ამ შემთხვევაში, არასამთავრობემა უნდა მიუთითონ, რომ კანონიდან არავინ არ უნდა გავიდეს.
„ის, რაც პარტიულ ოფისებზე თავდასხმებით, ბიბლიოთეკისა და წიგნების შეურაცხყოფით ხდება, ვანდალიზმია, მაგრამ ზუსტად ასეთი დონის ვანდალიზმია განათლებული, მოვლილი და ჭკვიანი ადამიანებისგან იმის ლაპარაკი, რომ თუ მათ მოსამართლის გადაწყვეტილება არ მოეწონებათ, კანონს დაარღვევენ. ეს განცხადებები კვერცხების სროლისგან და საღებავებისგან არ განსხვავდება და გაცილებით უფრო საშიშია. არასამთავროებს ვეთანხმები, მაგრამ ნაციონალებს მოვუწოდებდი, რომ კანონის ფარგლებიდან არ გავიდნენ და მაიდანზე ოცნებას თავი დაანებონ“, - აცხადებს ბერძენიშვილი.
ბერძენიშვილი მიიჩნევს, რომ არასამთავრობოები შენიშვნას იმათაც უნდა აძლევდნენ, ვინც სასამართლოს გადაწყვეტილების დაუმორჩილებლობაზე აკეთებენ განცხადებას.
„პოლიტიკური კულტურა მაღალი უნდა იყოს, მაგრამ არასამთავრობო სექტორმა უნდა იცოდეს, რომ თუკი მიკერძოებას დაუშვებს, მას არავინ არ მოუსმენს. მათ რომ მოვუსმინო, ამისთვის დარწმუნებული უნდა ვიყო. პრეზიდენტის გამოსვლა იმ ნაწილში კარგი იყო, რომ სხვამ ეს არ უნდა თქვასო, მაგრამ მოსამართლის მიმართ მოწოდება, სწორი არ იყო“, - განაცხადა ბერძენიშვილმა.
