ენერგეტიკის მინისტრი კახი კალაძე მიიჩნევს, რომ პრეზიდენტ გიორგი მარგველაშვილის განცხადება იყო პირდაპირი ზეწოლა მოსამართლეზე.
„აშკარად ჩანს მისი მხრიდან ჩარევა და ზეწოლა მოსამართლის მიმართ, რადგან ის მოსამართლეს მოუწოდებს, რომ არ მიიღოს ნაჩქარევი და ხისტი გადაწყვეტილება. თუ რას ნიშნავს ეს, ჩემთვის გაუგებარია და მე მოვუწოდებ პრეზიდენტ მარგველაშვილს, განმარტებები გააკეთოს ამასთან დაკავშირებით. არის დავა ორ სუბიექტს შორის, თუმცა ბოლოდროინდელი მოვლენებიდან გამომდინარე, აშკარად იკვეთება, რომ ეს არის დავა ქიბარ ხალვაშსა და „ნაციონალურ მოძრაობას“ შორის. მე, როგორც თანამდებობის პირი, თავს შევიკავებდი კონკრეტული განცხადებების გაკეთებისგან. დაველოდოთ სასამართლოს გადაწყვეტილებას“, - აღნიშნა ვიცე-პრემიერმა მთავრობის სხდომის დასრულების შემდეგ ჟურნალისტებთან.
საქართველოს პრეზიდენტმა გიორგი მარგველაშვილმა სპეციალურ ბრიფინგზე განაცხადა, რომ ბოლო დროს განვითარებულმა მოვლენებმა სამოქალაქო დაპირისპირების წინაპირობა შექმნა. მისი თქმით, მთარობის მეთაურის დღევანდელმა განცხადებამ ისედაც რთულ ვითარებაში მეტი დაძაბულობა შეიტანა. მარგველაშვილმა მოსამართლეს მოუწოდა, ნაჩქარევი და ხისტი გადაწყვეტილება არ მიიღოს.
